Тускъаты Таймураз федта социалон объектты арæзтад республикæйы районты

Рæвдауæндæттæ, спортивон комплекстæ, поликлиникæтæ æмæ фæзтæ. Тускъаты Таймураз радон хатт сбæрæг кодта социалон нысаниуæг цы объекттæн ис, уыдоны арæзтад. Бабæрæг кодта Æрæфы, Дыгуры æмæ Æрдоны районы арæзтадон фæзтæ. Нырыккон спортивон комлпекс сабитæн. Уавæртæ дзы сараздзысты уæгъдибар хъæбысхæст, бокс, баскетбол, футбол æмæ къуххæстæй архайынæн. Бæстыхай аразын райдыдтой ацы аз июны. Пъланмæ гæсгæ объект хъуамæ цæттæ уыдаид 3 азмæ. Фæлæ сӕ куыстытæ æххæстгæнæг компаниимæ баныхас кодтой 2 азмæ баххæст кæнын. Цыколайы 3-æм скъолайы спортивон залы бындурон цалцæг кæронмæ фæхæццæ кæны. Хъуамæ ма пъолыл сæрмагонд нысæнттæ скæной. Залы баивтой æппæт коммуникацитæ дæр. Сывæллæттæн сифтонг кодтой дзаумæттæ ивæн æмæ хинайæн уæттæ. Фарон райдыдтой хъæуы Уæлахизы фæз аразын. Куыстытæ адих кодтой 2 къæпхæныл. Бынаты фæзуат у 2 гектары. Ныридæгæн дзы сæвæрдтой хъазæн æмæ спортивон фæзтæ, бандæттæ. Сифтонг кодтой къахвæндæгтæ. Дарддæр ма дзы фæзындзæн Фыдыбæстæйы Стыр Хæсты бюсттæ дæр. Фæз цæттæ уыдзæн октябры. Дарддæр хæццæ кæны Æрæфы районы рынчындоны поликлиникæйы цалцæг дæр. Майæ нырмӕ бантыст баивын бæстыхайы сæр æмæ коммуникацитæ. Ныртæккæ кæнынц мидæггаг куыстытæ. Пъланæй фæкъуылымпы сты, арæзтадон æрмæджытæ кæй фæзынаргъ сты, уый аххосæй. Куыстытæ æххæстгæнæг компанийы ныхæстæм гæсгæ, хæстæгдæр 4 къуырийы объект уыдзæн цæттæ. Дигорайы та цæуы сывæллæтты поликлиникæйы бындурон цалцæг. Пъланмæ гæсгæ куыстытæ хъуамæ фӕуой декабры. Федта Тускъаты Таймураз Æрыдоны спортивон комплексы арæзтад куыд цæуы, уый дæр. Кусын йыл райдыдтой ивгъуыд аз мартъийы. Ныр цæуынц мидæггаг куыстытæ. Объекты проектон-сметон гæххæттытæ цæуынц экспертизæ дыккаг хатт. Бæрæг кæнынц куыстыты аргъ ногæй. Декабры комплекс хъуамæ йæ дуæрттæ байгом кæна. Æрыдоны аграрон-технологон колледж райста федералон проектмæ гæсгæ грант. 39 милуан сомæй балхæдтой ног кусæнгæрзтæ. Ифтонг дзы кæнынц ахуыргæнæндоны æрмадзтæ. Хуыйджытæ, ӕфсӕнӕндадзджытӕ, æмæ, хъæдæрмæгимæ кусыныл чи ахуыр кæны, уыдон ныр сæ дæсныйæдтыл кусдзысты нырыккон уавæрты. Цалдæр объектыл куыстытæ фæткæй фæфæстиат сты, Тускъаты Таймуразы ныхæстæм гæсгæ. Хъæуы сæм сæрмагонд цæстдард, цæмæй рæстæгмæ сцæттæ уой. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv