10-æм апрелæй Цæгат Ирыстоны паддзахадон университеты райдайдзæн сæрмагонд курсыты ног фæлтæр

Мебелы кондады конструктор-технологыл сахуыр кæнæн ис Цæгат Ирыстоны паддзахадон университеты физикон-техникон факультеты. Сæрмагонд профессионалон курсытæ дзы байгом, ног дæсныйад райсын кæй фæнды, уыдонæн. Национ проект «Демографи»-йы федералон проект «Содействие занятости»-йы фæлгæты зонгæ кæнынц ног дæсныйæдтимæ. Ахуырты æртыккаг фæлтæр дыууæ къуырийы фæстæ райдайдзæн «Фаблаб Алания»-йы. Архайджытæн бацамондзысты сæрмагонд кусæнгæрзтыл архайын æмæ сæ раст пайда кæнын. Университеты специалисттæ æмæ мебель аразджытæ курстыты архайджытæн раргом кæндзысты дæсныйады лыстæгдзинæдтæ. Лæвар сахуыр кæныны фадат ис, сывæллонмæ кæсыны тыххӕй йӕ куыстӕй уӕгъд чи у, ахæм сылгоймæгтæн. Афтӕ ма 4 мæймæ куыст чи не ссардта, уыцы рауагъдонтæн, стæй пенсийы агъоммæ чи ис æмæ ӕгуыстӕй аззайынӕй тæссаг кæмæн у, уыдонæн.