Æнæзакъонæй цуангæнджыты ивар фæфылдæр

Æрдз уарзын æви нæ, уый алкæмæн йæхи бар у. Фæлæ æрдзы хъæздыгдзинæдтæ, зайæгойтæ æмæ цæрæгойтæ хъахъхъæнын – хъуамæ нæ хæс уа. Хъыгагæн, се ппæт уыцы хъуыдыйыл хæст не сты æмæ тынг сарæх сты æнæзакъон цуангæнджытæ. Семæ тох кæнын нысанимæ æрдзон æвæрæнты æмæ экологийы министрады инспектортæ аразынц рейдтæ. Домæнтæм гæсгæ цуан кæныны рæстæг фæци. Уый хыгъд, хъæдты куы иу ранæй, куы иннæ ранæй райхъуысынц гæрæхтæ. Хъæдгæстæ та ссарынц сырдты мæрдæ. Радон рейды инспектортимæ абалц кодта не сфæлдыстадон къорд. Закъонхалджыты ссарынæн æмæ сæ æрцахсынæн инспектортæ цæмæй пайда кæнынц, уый базыдта уацхæссæг Пелиты Сабинæ. Сæ куыстмæ кæддæриддæр цæттæ. Цæгат Ирыстоны экологи æмæ æрдзон ресурсты министрады инспектортæ къордтæй рад хæссынц æнæзакъонæй цуангæнджыты р.бæрæг кæныны тыххæй. Алкæддæр сты къæрцхъус. Алы бон машинæтыл, фылдæр хатт та фистæгæй зилынц сæ бæрны цы хъæдтæ ис, уыдоныл. Бæрæг кæнынц хъæды хæдзарады уавæр. Закъонхалджытæ та æрхъуыды кодтой цæрæгойты марыны ног хуыз. Цуаны рацæуынц æхсæвыгон. Машинæйы цырæгътæ ныддарынц сырды цæстытæм. Уый та фæкуырм вæййы æмæ йæ цуанон фехсы. Домæнтæм гæсгæ, цуанонмæ хъуамæ уа бардæттæг гæххæт. Зæгъын хъæуы уый дæр закъонмæ гæсгæ æмæ цуангæнæн рæстæг фæци. Радон сезон райдайдзæн августы æртыккæгæм къуыри. Цæмæй цæрæгойтæ браконьерты къæппæджыты ма бахауой, уый тыххæй се ссарынæн инспектортæ бирæ мадзæлттæ аразынц. Сæ хæс у афоныл сæ рабæрæг кæнын æмæ дзы сырдты бахъахъхъæнын. Куысты сæйраг сусæгдзинад та у дæ алыварс лæмбынæг кæсын. Рæстæг сын зынаргъ у инспектортæ иу минут дæр æнцад нæ бадынц. Кæд 2015 азы закъонхалджытыл сарæзтой 27 протоколы, уæд 2016- 17 азты сты 49. Инсперктортæ алы хъæуты цæрджытимæ æмæ фæсивæдимæ арæх саразынц æмбырдтæ. Æмбарын сын кæнынц закъоны домæнтæ. Радзурынц цуаны рæстæг цы æмæ куыд æмбæлы кæнын, уый. «Нæ куыст у цуанæтты хæдзарады хайадмæ нæ цæст дарын. Ис нæм 4 хайад: «Æфсати» фонд, цуанæтты æмæ кæсагахсджыты æхсæнад, Цæгат-Ирыстоны паддзахадон цуанæтты æхсæнад æмæ паддзахадон бюджетон хайад-бЕркут. Нæ цæст дарæм фæдзæхст бынæттæм дæр: Заманхъулы, Урсдоны, Змейкæйы æмæ иннæтæм», –паддзахадон инспектор Нугзарты Марат загъта. Инспектортæ адæмы зæрдыл арæх æрлæууын кæнынц: дыццæг æмæ æртыццæг «сабыр бонтæ кæй хонынц», уый. Сабыр та уымæн æмæ уыцы бонты цуан кæнæн нæй. Æмæ уыцы домæн хъуамæ рох макæмæй уа. Специалисттæ зæгъынц, æрдз дæр адæймаджы хуызæн баулæфын фæхъæуы. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv