Суинаг стъалытæ

Цæгат Ирыстоны къахдзоныгътыл бырынæй æрыгон спортсментæ Козаты София, Виктория Коваленко æмæ Торчынты Аринæ Ростовы ерысты рамбылдтой сыгъзæрин æмæ æвзист майдантæ. Нырма кæд хæрзчысыл сабитæ сты, уæддæр уæлахизмæ бырсынæй фæстæ нæ фæлæудзысты. Æрвылбон сæхиуыл кусынц. Ихы `взонг æхсинты тыххæй - нæ дарддæры æрмæджы. Аксель, тулуп, флип - цæмæй къахдзоныхтæй бырыны хуызæй ацы элементтæ базонай раст кæнын, уый тыххæй тынг бирæ кусын хъæуы. Алы бон дæр цалдæр сахаты - тренировкæтæ. Торчынты Аринæ къахдзоныгътыл, 6 азы йыл куы цыд, уæд слæууыд. Йæ тренер гыццыл чызгимæ бирæ ныфсытæ бæтты. Тынг хорз бæрæггæнæтæ æвдисы. Хæрзæрæджы æрыгон спортсменкæ фесгуыхт Ростовы ерысты. Йæ хатдзæгтæм гæсгæ йын радтой фыццаг къæпхæны спортивон разряд. Дарддæр Аринæ йæхи цæттæ кæндзæн кандидат суæвынмæ. Торчынты Аринæ, спортивон скъолайы хъомылгæнинаг: «Мæ мад мæ, 6 азы мыл куы цыд, уæд радта къахдзоныгътæй бырынмæ. Уымæн æмæ арæх рынчын кодтон. Фыццаг мæ зæрдæмæ нæ цыд. Фæлæ фыццаг ерысты фæстæ ацы спорты хуыз бауарзтон. Тынг мæ фæнды фыццаг бынæттæ ахсын. Ме стырдæр бæллиц у спорты мастер суæвын, уый фæстæ та - тренер». Ацы чызджытæн се `стырдæр бæллиц у дунеон чемпионаты уæлахдзаутæ суæвын. Уырдыгæй Олимпаг сыгъзæрин майдан рамбулынмæ бирæ нал баззайдзæн. Ныртæккæ ууыл тынг бæстонæй кусынц. Кæд Козаты София æмæ Вероника Коваленкойыл нырма 6-гай азтæ цæуы, уæддæр Ростовы къахдзоныгътæй бырынæй ерысты "Юный фигурист", зæгъгæ, уым рамбылдтой фыццаг æмæ дыккаг бынæттæ. Æрыгон фигуристтæ ихмæ куы рахизынц, уæд сыл æппæты тынгдæр сæ ныййарджытæ батыхсынц. Куыд зæгъынц, афтæмæй райсомæй-изæрмæ сæ чызджыты раз вæййынц ихын фæзыл. Сæхæдæг раст къахдзоныгътыл слæууынмæ гæппывонг свæййынц. Наталья Гулай, фигуристкæйы мад: «Тынг бирæ рæстæг æрвитæм тренировкæты. Мæ цард мæ сывæллонæн снывонд кодтон. Райсомæй-изæрмæ ам вæййæм. Мæ сæр дзы бæрзæндты хæссын. Нырма хæрзчысыл у, фæлæ фыдæбон та бирæ кæны. Кæй зæгъын æй хъæуы, хуымæтæджы нæ - хорз бæрæггæнæнтæ æвдисы». Алы уæлахиз дæр чызджытæн дæтты ног тыхтæ. Разæнгард сæ кæны ног къæпхæнтæм хизынмæ. Ацы къуырийы кæрон æрыгон фигуристтæ сæ дæсныйад æвдисдзысты кахдзоныгътыл бырынæй ерысты. Уазиты Зæлинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv