«Æхсæрысæры хъæуы кадджын цæрæджы» ном радтой Колыты Виталийæн. Поэт, фыссæг, прозаик, публицист, тæлмацгæнæг, Уæрæсейы фысджыты уæнг, литературон-аивадон журнал «Ирæф»-ы сæйраг редакторы хæдивæг Æхсæрысæры фæцард 15 азы. Кадджын мадзал ацыд культурæйы бынæттон хæдзары. Скъоладзаутæ бакастысты Колыты Виталийы æмдзæвгæтæ. «Кæд Хъæрæсе-Черкессийы райгуырдтæн, уæддæр мæ райгуырæн бынатыл нымайын Æхсæрысæр. Каст фæдæн бынæттон скъола. Уарзын хъæуы цæрджыты. Стыр бузныг дæн, ахæм стыр аргъ мын кæнынц, уый тыххæй», - загъта Колыты Виталий. Æхсæрысæры кадджын цæрæджы номæй ма схорзæхджын кодтой Цъугкиты Барисы. Профессор, хъæууон хæдзарады наукæты доктор, 25 азæй фылдæр разамынд лæвæрдта биотехнологийы факультетæн. Кадджын нæмттæ раттыны хъæппæрис разынд бынæттон администрацийы сæргълæууæг Дзидзойты Тасолтанмæ.