Цæгат Ирыстоны сæргълæууæг Сергей Меняйло кусæг балцы уыд Алагиры районы
Цæгат Ирыстоны сæргълæууæг Сергей Меняйло бабæрæг кодта Алагиры Район. Йæ балцы рæстæг федта кинотеатр «Комсомолец» æмæ горæты сæйраг парк. Йе 'ргом аздæхта районы риссагдæр фарстатæм. Республикæйы сæргълæууæджы кусæг балцы фыццаг бынат — районы æппæты егъаудæр суадон — донисæн «Южный». «Южный» æмæ «Гусаринский водозабор» нуазыны донæй ифтонг кæнынц цæрджыты фылдæр хай. Зæрæмæджы ГЭС æмæ донисæны рæзты былгæрæттæ цы фидаргæнæн мадзæлттæ ис, уыцы арæзтадон куыстыты аххосæй архайд дыууæ хатты фæкъаддæр. Ивгъуыд азы дзы сног кодтой 11 цъассы. Фæлæ рæстæг куыд цæуы, афтæ сæ потенциалон тых лӕмӕгъдӕр кӕны. Ахæм уавæр та тæссаг у доны дефицитмæ расайынæй. Æнæмæнг, хъæуы аразын донисæн ифтонггæрзтæ æмæ донæй æххæстгæнæн системæ рацаразын. Уыцы фарстайыл лæмбынæгдæр куыстадон фембæлды рæстæг æрныхас кодтой Уæрæсейы хицауады сæрдар Марат Хуснуллин æмæ республикæйы сæргълæууæг Сергей Меняйло. Уымæй уæлдай федералон проект «Чистая вода»-йы фæлгæты 2024 азмæ фæнд кæнынц объект «Реконструкция водопроводных сетей Алагира» царды ауадзын. Уыимæ ма, паддзахадон программæ «Развитие СКФО»-йы фæлгæты ацы аз арæзт æрцыд проектон-сметон документаци «Реконструкция сетей водоснабжения населённых пунктов горной части Алагирского района» тыххæй. Ахсджиаг фарстаты 'хсæн ма — районы хъармгæнæн системæтӕ сног кæнын. Къостайы уынджы бирæуæладзыгон хæдзары хъармгӕнӕн ахсы бирæ бынат, уыимæ кусы ӕгӕр хьӕрӕй. Сергей Меняйло профилон министрад æмæ районы минæвæртты раз сӕвæрдта иумæйагæй фарста аиуварс кæныны хæс. Алагиры фæндзæм скъола фидæны аз бындуронæй сцалцæг кæндзысты республикæйы хардзæй. Уымæй уæлдай ма Сергей Меняйло бабар кодта хæстæгдæр рæстæг бацæттæ кæнын дыккæгæм скъолайы бындурон цалцæджы пълан. Уæлæмхасæн ма дзы фæзындзæн актон зал æмæ хæрæндон. Уыимæ ма сæргълæууæг базонгæ кадетты кълæсты ахуырадон уавæртимæ. Ныртæккæ районы ис дыууæ ахæм къласы. Дыккæгæм скъолайы бындурыл «слестгæнæн комитет» къабазмæ гæсгæ æртыккæгæм скъолайы та базонынц «арæнхъахъхъæнджыты службæйы сусæгдзинæдтæ. Æнæмæнг предметтæй уæлдай ма сывæллæттæн кæсынц сæ физикон цæттæдзинадмæ. Уæ зæрдыл уын æрлæууын кæндзыстæм, Сергей Меняйлойы хъæппæрисæй Цæгат Ирыстоны гом кæнынц кадетон кълæстæ. Хуыздæртæн дарддæр ахуыр кæныны бар уыдзæн Слестгæнæн комитеты академийы Мæскуыйы æмæ Петербургы. Фидæны ма республикæйы кадетон кълæстæ фæзындзæн æнæнхъæлæджы уавæрты министрады къабазы æмæ хъазахъхъæгты кадетон кълас. Уымæй уæлдай ма ног азы республикæйы хардзæй бындуронæй сцалцæг кæндзысты кинотеатр «Комсомолец». Ныртæккæ ис заууат уавæры. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv