WorldSkills-Russia

Ивгъуыд аз фæззæджы нæ бæстæйы алы регионы дæр ацыдысты кусæг дæсныйæдты ерыстæ WorldSkills, зæгъгæ. Цæгат Ирыстонæй 17 æрыгон специалисты банымадтой хуыздæртыл. Уæлахиздзауты схорзæхджын кодтой майдантæ æмæ премитæй. Ныр та фæсивæд æнхъæлмæ кæсынц регионты æхсæн æвзарæн къæпхæнмæ. Уый фæстæ та хуыздæртæ ацæудзысты Казаньмæ. Уым уыдзæн ерысты финал. Фæсивæд æм куыд цæттæ кæнынц, уый базыдта не сфæлдыстадон къорд. Дзигойты Ревмирæйы фæнды модельер суæвын. 9 къласы каст куы фæцис уæд бацыд ахуыр кæнынмæ лицеймæ. Æнтысджынæй кæй ахуыр кодта,уымæ гæсгæ йæ бафæндыд йæ тыхтæ Worldskills,зæгъгæ ерысты бавзарын. Æмæ дзæгъæлы нæ, Цæгат Ирыстоны сси фыццаг. Ныртаккæ æрыгон дæсны йæ ахуыргæнджытимæ цæттæ кæны ерысты иннæ къæпхæнмæ. Арæзт æрцæудзæн æндæр регионы. Кæд æркасты цы хæслæвæрдтæ уыдзæн уый нæма зоны, уæддæр Ревмирæ йæхи бæстонæй цæттæ кæны. Дзæуджыхъæуы политехникон техникумы студенттæ та ерыстæй æдзухдæр хæрзиуджытæ сласынц. Ахæм фæсивæдæй ахуыргæнджытæ сæ сæр бæрзæндты хæссынц æмæ сын æххуыс дæр фæкæнынц. Багаты Давид бацахста фыццаг бынат регионы рог хæдтулгæтæ цалцæг кæнынæй. Регионты æхсæн къæпхæны та йæ бахъæудзæн фæсарæйнаг хæдтулгæйы мотор сæмбырд кæнын. Фæлæ æрыгон лæппуйæн йæ авналæнтæ къуындæг сты. Ахуыргæнæндоны æмбæлгæ кусæнгарз нæй хи бацæттæ кæнынмæ. Æрыгон профессионалты 7-æм æркасты финал уыдзæн Казаны. Нæ командæйы ис 17 адæймаджы. Уыдон сæхи къабæзты нæ республикæйы сты хуыздæртæ. Фæлæ финалмæ бахауыны размæ сæ хъæуы раззагдæр бынæттæ æвзарæн къæпхæны бацахсын. Уыдон арæзт æрцæудзысты уалдзæджы. Гугкайты Алан, РЦИ-Аланийы ахуырад æмæ наукæйы министрады профессионалон ахуырады хайады сæргълæууæг :  «Ныртæккæ сæхи æнтыстджынæй цæттæ кæнынц æндадзджытæ, аразджытæ, хæринаггæнæнджыты. Ома, æдæппæтæй цал дæсныйадæй сарæзтам чемпионат, уыдоны уæлахиздзаутæ ныр сæхи цæттæ кæнынц æвзарæн къæпхæнмæ. Дарддæры ерыстæ араздзысты нæ бæстæйы алы горæтты апрел æмæ майы». Ныртæккæ кусæг дæсныйæдтæ фæсивæды хсæн кæнынц парахатдæр. Уымæн æвдисæн - æркаст Worldskills - ы æрвылаз фылдæрæй-фылдæр архайджытæ кæй ис, уый. Майы мæй мингай фидæны электриктæ, хæринаггæнджытæ, æндазджытæ, æмæ конструктортæ сæмбырд уыдзысты Казаны. Ерысты дзы алчидæр равдисдзæн йæ арæхстдзинад æмæ йæ дæсныйады хуыздæр суæвыныл тох кæндзæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv