700 мин студентæй фылдæр ацы аз фыццаг хатт бакъахдзæф кодтой Уæрæсейы уæлдæр ахуыргæнæндæтты къæсæр

Иумæйаг фæлварæнтæ сын ахицæн сты. Иннæ аз та кæмæ æнхъæлмæ кæсынц, уыдоны, куыд фæзæгъынц, «сæр бахъуыд». Ацы азы исæн кампанийы хатдзæгтæй цы зæгъæн ис æмæ скъоладзауты рауагъдонтæ фидæнмæ цæмæ æнхъæлмæ кæсой? Уыцы фæрстытæн дзуапп радтой нæ бæстæйы раззагдæр уæлдæр ахуыргæнæндæтты разамонджытæ. 2020 азы исæн кампанийы домæнтæ бацæттæ кæндзысты æмæ бæрæг уыдзысты 1-æм октябры. Иумæйаг паддзахадон фæлварæн цавæр предмæттæй раттæн ис, уый фæнысан кæнæн уыдзæн декабрæй - февралы онг. Ахуырады къабазы цы ивддзинæдтæ æрцыд, уыдонæй сæйрагдæртæй иу - ацы аз инженерон дæсныйæдтæ райсынæн фылдæр курдиæттæ кæй разынд, уый. Иу бынатмæ - 20 адæймаджы. Уыимæ сæйраг горæтты йæ хъул сах кæмæн нæ абадт, уыдон æнæзивæгæй регионалон ахуыргæнæндæттæм бацыдысты. Уый, специалистты хъуыдымæ гæсгæ, уым æвзæрæй æппындæр ницы ис. Се ’хсæн ис, иттæг хорз зонындзинæдтæ кæм дæттынц, ахæмтæ. Афтæмæй, сæ кад бæрзонддæр кæны, Мæскуы æмæ Санкт-Петербургы ахуыргæнæндæттимæ баргæйæ. Бафиппайын ма хъæуы, ныртæккæ скъоладзаутæ фидæны дæсныйад равзарынмæ сæрæн кæй сты, уый. Ома, сæхæдæг рагацау фæзонынц, кæм æмæ цы дæсныйадыл ахуыр кæндзысты. Ис ма сын ахæм фадат - сæ бон у уыцы иу рæстæг курдиæттæ 5 ранмæ дæр бадæттын. Ацы хъуыддаджы та «цас фылдæр фæлварæнтæ радтон, уыййас гæнæнтæ фылдæр уыдзысты искуыдæм ахуыр кæнынмæ бацæуын», зæгъгæ. Иннæмæй та, æнцондæртæй цы предметтæ ис ныффыссæн, уыдон арæх сæ фæндтæ сæххæст кæнынæн пайдайаг нæ разынынц, æмæ сæ уый дæр фæсайы. Рауагъдонтæ ма ныфс фæдарынц коммерцион ахуырадыл дæр. Фæлæ, специалисттæ куыд зæгъынц, афтæмæй уырдæм дæр конкурсы хуызы исынц ныр. Ома, хуыздæр йæ зонындзиæндтæ чи равдиса, фыццаджыдæр уыдоны. Цæгат Ирыстоны Паддзахадон Университеты куыд зæгъынц, афтæмæй исæн кампани ацы аз ацыд фæткмæ гæсгæ. Ног ахуырадон азмæ цы ногдзинæдтæ уыдзæн, уыдон сбæрæг кæндзысты профилон министарды. Нырмæ уал университеты гом у фæсаууонмæ ахуыры исæн къамис. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv