РЦИ-А полилингвалон ахуырады проект æххæст кæнынц 23 скъола æмæ сывæллæтты 67 рæвдауæндоны бындурыл

Цæгат Ирыстоны скъолаты æмæ сывæллæтты рæвдауæндæтты дарддæр æххæст кæнынц полилингвалон ахуырады проект. Системæ фæлварын куы райдыдтой, уæдæй нырмæ рацыд 4 азы. Ныртæккæ парахат кæны республикæйы скъолаты æмæ  сывæллæтты  рæвдауæндæтты. Цы хатдзæгтæ ис скæнæн полилингвалон ахуырады тыххæй, уый радон хатт сбæрæг кодтой республикæйы Ахуырад æмæ наукæйы министрады специалисттæ. Ацы хатт араст сты Рахизфарсы районмæ. Беслæны сывæллæтты 7-æм рæвдауæндоны хъомылгæнинæгтæ бацæттæ кодтой театралон равдыст. Алкæмæндæр дзы ис йæхи сурæт. Сцæнæйыл арæхсынц иттæг хорз. Уæвгæ, иронау æмдзæвгæтæ кæсын æмæ зарджытæ кæнын полилингвалон ахуырадæн у æрмæст йæ иу хай. Ацы рæвдауæндоны йæ æнтыстджынæй æххæст кæнынц. Ахуыртæ æппынæдзух — иронау, суанг ма физкультурæйы дæр хъомылгæнджытæ пайда кæнынц полилингвалон системæйæ. Полилингвалон къорды ис 40 сабийы. Æмæ кæд сæ иутæ кавказаг мыртæ нырма хорз нæ дзурынц, уæддæр, хъомылгæнджыты ныхæстæм гæсгæ, хъуыдыйæдтæ аразынц хорз. Æмдзæвгæтæ æмæ зарджытæ ахуыр кæнын та сæм зын æппындæр нæ кæсы. Бафиппаинаг у уый дæр, æмæ сывæллæты 'хсæн ис æндæр адæмыхæттыты минæвæрттæ дæр. Цæгат Ирыстоны полилингвалон системæмæ гæсгæ архайынц 100 къордæй фылдæр сывæллæтты 67 рæвдауæндоны æмæ 53 къласы 23 скъолайы. Уыдон иуылдæр хауынц райдайæн скъоламæ. Ахуыргæнинæгтæн зонындзинæдтæ амонынц уыцы иу рæстæг 2 æвзагыл. Мадæлон æвзаг хъуамæ цæра, зæгъынц программæ аразджытæ. Ахуыртæ цæуынц куыд уырыссаг, афтæ ирон æвзагыл дæр, фæлæ сæ мидис ницæмæй хицæн кæны. Ахуырадон уагдæттæ ифтонг сты æппæт хъæугæ методикон æрмæгæй. Ныййарджыты чингуытæ æмæ тетрæдтæ æлхæнын нæ хъæуы. Ахуыргæнджыты ныхæстæм гæсгæ, ахæм хуызы практикæйæн ныридæгæн ис хорз фæстиуджытæ. Зæгъæм, 5-æм скъолайы ахуыргæнинæгтæ мадæлон æвзагыл дзурынц æнæкъуылымпыйæ. Суанг математикон терминтæм дæр арæхсынц. Сывæллæттæ алы урокмæ дæр сæхи зæрдиагæй бацæттæ кæнынц. Ног æрмæг та бамбарынц хорз. Республикæйы ахуырад æмæ наукæйы министрад æмæ ЮНЕСКО-йы кафедрæ æппынæдзух бæрæг кæнынц, проект куыд æххæстгонд цæуы, уый. Бахъуаджы рæстæг та ахуыргæнджытæн се ’ххуысы къух бадарынц. Мадæлон æвзаг сабибонтæй фæстæмæ бауарзын кæнын. Уыцы нысан ныртæккæ къухы æфты полилингвалон ахуырады фæрцы. Азæй азмæ проекты кæй фæнды бацархайын, уыдоны нымæц дæр рæзы. Æмæ, чи зоны, афтæ зæрдæргъæвдæй куы архайæм, уæд ирон æвзагæн фесæфынæй, ферох кæнынæй тæс нал уыдзæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv