Дзæуджыхъæуы райдыдтой Петербургы Леонид Якобсоны паддзахадон академион театры гастролтæ. Афтæ, Мариинаг театры филиалы равдыстой зынгонд «Лебединое озеро»-йы.  Дæсны артисттæ, цымыдисаг сюжет æмæ Петр Чайковскийы музыкæ уайтагъд ссардтой аивадуарзджыты зæрдæтæм фæндаг. Принц Зигфриды галуаны бал. Сæйраг хъайтар - Андрей Сорокин. Уазджытæ хъæлдзæгæй æрвитынц сæ рæстæг. Кафынц. Чызджытæй алкæцыйы дæр фæнды принцы зæрдæмæ фæцæуын. Аив, уæнгрог, хæрзконд æмæ зæрдæхæларæй зонынц иууылдæр принцы. Абон йæ хъайтары хуыздæр миниуджытæ равдисыныл Андрей Сорокин бæстонæй архайдта. Театр ын йæ курдиат раргом кæнынæн дæтты æгæрон тыхтæ.  Аивадуарзджытимæ æнкъарæнты фӕрцы ныхас кæнын. Ныр дыккæгæм аз Одеттæ — Елена Черновайы зæрдæйы уадзынц ныфс. Йæхæдæг куыд зæгъы, афтæмæй сценæмæ йæ алы рацыд дæр раст цыма фыццаг хатт вæййы. Ирыстойнаг театруарзджыты хæлардзинад, зæрдæмæдзæугæ сценæ йын хæссынц удæнцой. Йæ хъайтар кæд уæздан у, уæддæр йæ удыхъæд хъæддых у. Урс æмæ сау доныхъазтæ –  Одеттæ æмæ Одилия. Уарзондзинад æмæ гадзрахатдзинад. Ам алцыдæр диссаг у. Æвзонг чызджы хъысмæт. Кæлæнгæнæджы сау къухтæй фестад доныхъаз. Рагон цауæн музыкæ ныффыста Петр Чайковский. Æнусты сæрты йын йæ музыкæмæ гæсгæ æвæрд балет хæссынц йæ кад æнæфæцудгæйæ. Уарзæтты хъысмæты тыххæй цау ирыстойнаг аивадуарзджыты размæ рахастой Петербургы балеты паддзахадон академион театры архайджытæ. Уый къухы бафтыд программæ "Большие гастроли" æххæст кæнгæйæ. Спектакльтæ æмæ концерттæ сæрмагонд программæйы фæлгæты цæуынц Калининградæй Цæгат Кавказы онг.  «Большие гастроли» аивадуарзджыты зонгæ кæны уæрæсейаг æмæ фæсарæйнаг хуыздæр театрты спектакльтимæ, зынгонд коллективты концертон программæтимæ. Дарддæр Цæгат Ирыстоны театрдзаутæ фендзысты спектакль «Дон Кихот».