Æнæниздзинады тыххæй

Цæгат Кавказы регионты лæвар медицинон æххуысы хæрзхъæддзинад фæхуыздæр кæныныл ныхас кодтой Цæгат Кавказы Федералон зылды Уæрæсейы президенты æххæстбарджын минæвары цур Советы æмбырды. Регионты сæргълæуджытæ, се 'хсæн Битарты Вячеслав дæр, афтæмæй, æмбæлгæ министрадтæ æмæ медицинон кусæндæтты минæвæрттæ фембæлыдысты Грознайы. Александр Матовников æмбырды архайджыты зæрдыл æрлæууын кодта, хицауады сæйраг хæстæй иу æнæниздзинад хъахъхъæныны къабазыл кусын кæй у. Ууыл «майы» уынаффæты дзырдта нæ бæстæйы президент Владимир Путин. Уæрæсейы æнæниздзинад хъахъхъæныны министры фыццаг хæдивæг Татьяна Яковлева куыд фæбæрæг кодта, афтæмæй Цæгат Кавказы Уæрæсейы иннæ регионтимæ абаргæйæ, царды дæргъвæтиндзинад фылдæр у. Фæлæ уый хыгъд бафиппайдта, лæгмæрдтимæ фæндаггон фыдбылызтæ дзы фылдæр кæй цæуы. Уæдæ ноггуырд сывæллæттæ дæр Цæгат Кавказы арæхдæр амæлынц. Зæгъын хъæуы уый, æмæ Цæгат Ирыстоны медицинон æххуысы хæрзхъæддзинад фæнд кæнынц цалдæр федералон проекты руаджы фæбæрзонддæр кæнын. Зæгъæм, республикæйы æнæниздзинад хъахъхъæныны 40 объекты хъуамæ сцалцæг кæной. Сæ техникон фадæттæ дæр сын хъуамæ фæуæрæхдæр кæной. Æмбырды ма æрныхас кодтой, кæронмæ цы арæзтадтæ ахæццæ кæнын хъæуы, уыдоны нымæц фæкъаддæр кæныныл дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv