Алцыдæр иронау

Иронау нымайынц, фыссынц æмæ дзурынц. Дзæуджыхъæуы 38-æм скъолайы ацы аз байгом полилингвалон кълас. Ам алы предметтæ ахуыр кæнынц ирон æвзагыл. Ног ахуырадон системæйыл разы сты ныййарджытæ дæр. Афтæ, Пхалæгаты Аллæ райдайы йæ урок. Фыццагкъласонтæ ам бирæ сты, 6 къласы. Фæлæ дзы полилингвалон системæмæ гæсгæ ацы аз ахуыр кæнын райдыдта 1 кълас. Байгом Цæгат Ирыстоны паддзахадон университеты ЮНЕСКО-йы кафедрæйы специалистты хъæппæрисæй æмæ нæ республикæйы ахуырад æмæ наукæйы министрады бардзырдмæ гæсгæ. Пхалæгаты Аллæйы ныхæстæм гæсгæ, кæд æмæ сæ фылдæр сты горæттæгтæ, уæддæр ирон æвзагыл предметтæ ахуыр кæнынц бæстон æмæ цымыдисæй. Ацы къласы ахуыр кæны 21 сывæллоны. Се`хсæн иу узбекаг иннæ та уырыссаг. Иннæ сабитимæ иухуызон ахуыр кæнынц æмæ зæрдæргъæвдæй кусынц. Кæд сын ирон мадæлон æвзаг нæу, уæддæр ыл стыр зæрдæ не сты. Цæмæ уарзут мадæлон æвзаг? Уыцы фарстайæн алчидæр ратта алыхуызон дзуапп. Фæлæ сæ хъуыды у иу - ирон æвзаг хъуамæ сæфт ма уа. Аив чи кæсы æмдзæвгæтæ, зæгъгæ сæ куы бафæрсай, уæд иууылдæр иумæ сæ къухтæ сдарынц. Бакæсын æмæ рæсугъд радзурын фæнды алкæйдæр. Специалистты ныхæстæм гæсгæ, полилингвалон ахуырад сывæллæттæн сæ зонындзинæдтæ фылдæр кæны. Уыимæ ма сæ цæстæнгас æвзаджы уавæрмæ хуыздæрырдæм ивы. Ирон æвзаджы тыххæй ис бирæ дзурæн. Фæлæ ныхæстæй бæлвырд куыст хуыздæр. Нæ фыдæлтæ нын цы ныууагътой, уыцы хæзнатæй иу у - нæ мадæлон æвзаг. Дзурын æмæ йæ хъахъхъæнын та у нæ иумæйаг хæс. Пелиты Сабинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv