Ахуырадæн кар нæй

Ахуыр кæнын кæй фæнды, уый йæ азтæм нæ кæсы. Æмбары йæ - æрæгмæ никæд вæййы. Ахæм хъуыдыйыл хæст у нæ дарддæры æрмæджы хъайтар - Хъулаты Алыксандр. Цæуы йыл 56 азы. Фæлæ йæ азтæ ницæмæ даргæйæ ацы аз ссис Цæгат Ирыстоны паддзахадон университеты студент. Цавæр факультет равзæрста æмæ куыд ахуыр кæны, уый нæ уацхæссæгæн радзырдта. Нæ сюжеты сæйраг хъайтар Хъулаты Алыксандр кæд æрыгон лæппу нал у, уæддæр партæйы уæлхъус сбадтис. Ныр студенты ном хæссы. Фæнды йæ уæлдæр ахуырад райсын. Иннæ ахуыргæнинæгтæй ницæмæй хицæн кæны. Бады фыццаг партæйыл, лæмбынæг хъусы ахуыргæнæгмæ, ног æрмæг уайтагъд йæхимæ афыссы. Студенттæ дæр æм хионы цæстæй кæсынц. Хонгæ та йæ Сашæ кæнынц. Йæ рæстæджы Алыксандр æрмæст 9 къласы каст фæцис, фæлæ йæ æппынæдзух фæндыд уæлдæр ахуырад райсын. Бæлвырд æй нæ зыдта, цавæр дæсныйад, уый. Фæлæ йæ бæллиц сæххæст кæнынмæ фыццаг къахдзæф дæр акодта - 9 предметæй радта паддзахадон иугонд фæлварæнтæ. Хъулаты Алыксандр: «Чингуыты дуканийы федтон «Геодезия-это очень просто», зæгъгæ, сæргондимæ чиныг. Цымыдисаг уыд. Географи æмæ геодези хæстæг наукæтæ сты. Кæд бирæты хъуыдымæ гæсгæ æрыгонæй æнцондæр ахуыр кæнын у, уæд мæнæн æппындæр зын нæу. Ахуырмæ мæ лæппуйæ сæрæндæр дæн». Ныртæккæ Алыксандр «Кавдоломиты» кусы. Фæлæ уый йæ ахуырыл нæ фæбæрæг, нæ йæ хъыгдары. Дыууæ хъуыддаджы дæр тынг æнтысджынæй æххæст кæны. Йæ ахуыргæнджыты ныхæстæм гæсгæ, ацы студент тынг цымыдис у. Иннæ студентæй хицæн кæны йæ цыргъ зондæй. Тебиаты Делярæ: «Ахуыры йæхи тынг хорз æвдисы. Тынг цымыдисаг у, бирæ зонаг. Уæлдæр ахуырад райсгæйæ та, йæ зонындзинæдтæ фæфылдæр æмæ парахатдæр уыдзысты. Йæхæдæг дæр тырны арф зонындзинæдтæм». Раст кæны æви нæ, ууыл Алыксандры бинонтæ дызæрдыг кодтой. Йæ фарс рахæцыд æрмæст йæ фырт, уый дæр студент у. Раст зæгъгæйæ, Алыксандр æй йæхæдæг дæр нæма зоны, уæлдæр ахуырады фæстæ цы кусдзæн, уый. Фæлæ куыд зæгъы, афтæмæй йæ тынг фæнды исты хъæуы скъолайы ахуыргæнæгæй кусын. Хъулаты Алыксандр: «Мæн фæнды хъæуккаг скъолайы географийы ахуыргæнæгæй кусын. Хъæуккаг скъолайы та уымæн æмæ хъæуы æрдз цыма удæгас у, афтæ мæм кæсы. Тынг æй уарзын. Хъæд бæзджын. Стъалытæ бирæ. Хъæуы сæм раст цыма къухæй бавналæн ис, афтæ мæм фæкæсы». ЗК. Алыксандр ахуыр кæндзæн 4 азы. Райсдзæн географы дæсныйад. Йæ сесситæ, семинартæ, наукон æркастытæ, иуныхасæй, студенты царды æууæлтæ нырма разæй сты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv