Хъæбæлоты Билары номыл паддзахадон стипендийы исджытæ

Цæгат Ирыстоны уæлдæр ахуыргæнæндæттæй 6 студенты исдзысты Хъæбæлоты Билары номыл паддзахадон стипенди. Снысан æй кодтой 2017 азы. Стипенди аккаг кæнынц ахуыры хорз бæрæггæнæнтæ чи æвдисы, стæй наукон-иртасæн æмæ æхсæнадон куыст чи кæны, уыцы студенттæн. Йæ бæрц 10 мин сомы. Гæбæраты Георгий ахуыр кæны нæ республикæйы медицинон академийы 6-æм курсы дзæбæхгæнæн факультеты. Уыимæ ма кусы академийы клиникон рынчындоны хирургийы хайады медицинон æфсымæрæй. Йæхи фæлвары наукæйы. Æнтыстджынæй архайы алыхуызон конференциты æмæ олимпиадæты. Йæ куыстытæ мыхуыр кодта нæ бæстæйы æмæ фæсарæнты наукон журналты. Йе `нтыстдзинæдты тыххæй ын саккаг кодтой Хъæбæлоты Билары номыл паддзахадон стипенди. Гæбæраты Георгий, Цæгат Ирыстоны медицинон академийы Дзæбæхгæнæн факультеты 6 курсы студент: «Фыццаг хатт куы базыдтон ахæм стипенди сæ кæй фæнды мæнæн снысан кæнын, уæд иу чысыл фæтыхстæн. Æхсызгон мын уыди. Нæ республикæйы хицауадæй дæн стыр бузныг. Ахæм мадзалы руаджы студентты дарддæр разæнгард кæнынц ногдзинæдтæм, тырнын сæ кæнынц дарддæры уæлахизтæм. Мæнмæ гæсгæ, афтæ студенттæ сæхи æнтыстджынæй æвдисдзысты сæ дарддæры куысты». Гокъоты Елизаветæ дæр у дæнцæгæнхæссинаг студент. Йе `нтыстдзинæдтæ бирæ сты. Алыхуызон наукон журналты мыхуыры цыдысты йæ наукон статьятæ. Уæдæ конференциты иу æмæ дыууæ хатты нæ архайдта. Фæлæ ма уымæй уæлдай, Елизавета у аивадон гимнастикæйы спорты дæсныйы кандидат. Гокъоты Елизаветæ, Цæгат Ирыстоны медицинон академийы Дзæбæхгæнæн факультеты 6 курсы студент:  «Мæ хæрзиуджытæ иууылдæр æрæмбырд кодтон. Спорт дæр нæ аиуварс скодтон. Собеседованимæ куы рбацыдтæн, уæд цымыдис сæм фæкастис, ахуырæй уæлдай ма спорты дæр кæй архайын, уый. Сæ зæрдæмæ фæцыд. Мæнæн уый уыд тынг æхсызгон». Медицинон академийы ахуыргæнджытæ æмæ йæ разамынд куыд зæгъынц, афтæмæй сæ студенттæ алкæддæр сæхи хорз равдисынц куыд ахуыры, афтæ куысты дæр. Сты курдиатджын фæсивæд. Саламты Руслан, Цæгат Ирыстоны медицинон академийы клиникон рынчындоны реанимаци æмæ интенсивон терапийы хайады разамонæг: «2017 азæй фæстæмæ Гæбæраты Георгий кусы ам. Гокъоты Елизаветæ та 2018 азæй нырмæ. Сæхи равдыстой иттæг хорз. Афоныл сæ хæслæвæрдтæ кæронмæ саразынц.  Куыстæй уæлдай ма сæ фæнды æмæ архайынц наукæйы къабазы. Дарддæр сын фылдæр бантысдзæн». Æппæт Уæрæсейы ахæм стипенди райсын бафæндыд 32 студенты. Уыдон уыдысты уæлдæр ахуыргæнæдæтты æмæ астæуккаг ахуырады студенттæ. Сæйраг домæн уыди, цæмæй архайджытæ уой Цæгат Ирыстоны скъолаты рауагъдонтæ. Гæбæраты Лианæ, Цæгат Ирыстоны медицинон академийы Æхсæнадон æнæниздзинад æмæ æнæниздзинадхъахъхъæнынады кафедрæйы доцент: «Ахæм студенттимæ кусын у æнцон. Алкæддæр сты цæттæ. Рауайдзæн сæ тынг хорз дохтыртæ, кæнæ наукон кусджытæ. Бацæттæ кодтой дзæвгар наукон-иратсæн куыстытæ. Стыр бузныг сын зæгъæм, ахæм фæсивæдæй нæ сæр бæрзонд кæй хæссæм». Хъæбæлоты Билары номыл паддзахадон стипенди ист цæуы 2017 азæй фæстæмæ. Йæ райсыныл архайынц нæ республикæйы уæлдæр ахуыргæнæндæтты æмæ профессионалон училищæты студенттæ. Йæ бæрц у 10 мин сомы. Снысан æй кæнынц 1 азмæ. Хъæбæлоты Билары номыл республикон стипенди студенттæн у зынаргъ. Фыццаджыдæр сын сæ фæллойæн аргъ кæй скæнынц, уый тыххæй. Фæлæ йæ финансон хай дæр ахсджиаг у. Ахуыр кæны, равзæрст дæсныйадыл ахадгæйæ куы кусай, уæд дæ фæллой æнæрхъуыдыйæ кæй нæ баззайдзæн, ууыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv