Фæрниаты Тамерланæн радта кады гæххæт «Æрыгон Хъайтарæн»

«Æрыгон Хъайтар» æмæ «Æфсæддон Хъæбатыры» ном хæссы Дзæуджыхъæуы 5-æм училищæйы ахуырадзау Фæрниаты Георгий. Кæд ыл 16 азы йеддæмæ нæма цæуы, уæддæр ныридæгæн у дæнцæгæн хæссинаг. Фæрниаты Георгий фервæзын кодта цалдæр царды. Ахæм æхсардзинады тыххæй йæ схорзæхджын кодтой кадджын майдантæй. Æрæджы та йын Цæгат Ирыстоны парламенты сæрдар Алексей Мачнев радта Парламенты номæй кады гæххæт. Куыд фæбæрæг кодта, афтæмæй фæсивæды`хсæн ахæм хъæбатыртæ кæй рæзы, уый хорз æвдисæн у. Фæрниаты Георгийы ном сæрды æнæхъæн республикæйы цæрджытæ дæр базыдтой. Доны станцæйы йæ лымæнтимæ сæрдыгон бон улæфыди. Æвиппайды гыццыл лæппу доны ныгъуылын райдыдта. Геор уый куы федта, уæд иу уысм дæр нæ фæфæстиат кодта, афтæмæй доны йæ фæдыл ныггæпп кодта. Лæппуйы фервæзын кодта. Геор баххуыс кæнынмæ кæддæриддæр цæттæ кæй у, уымæн æвдисæн æрмæст уыцы хабар нæу. Георгий цы лæгдзинад равдыста, уый фæдыл æй фæхуыдтой Мæскуымæ. Æрыгон хъайтарты форуммæ. Æрæмбырд дзы сты 200 сабийы Уæрæсейы алы регионтæй. Георы схорзæхджын кодтой дыууæ майдайнæй. «Юный герой», æппæтуæрæсеон организаци «Иугонд Уæрæсе»-йы æрыгон гвардийæ. Стæй ма, хæрзиуæг «За ратную доблесть», зæгъгæ, ветеранты организаци «Боевое браство»-йæ. Георгийæн тынг æхсызгон уыди, ахæм кадджын хæрзиуджытæ йын кæй балæвар кодтой, уый. Ныртæккæ æрыгон хъайтар ахуыр кæны Дзæуджыхъæуы 5-æм училищæйы. Равзæрста токары дæсныйад. Ахуырты рæстæг кусы алухуызон станоктимæ. Кæд нырма фыццæгæм курсы студент у, уæддæр цы лæппутимæ ахуыр кæны, уыдон дæр дзы хорз йеддæмæ ницы зæгъынц. Училищæйы Георгийы лæгдзинадæй сæрыстыр сты. Йæ ахуыргæнджытæн дæр у фæзминаг кæстæр. Æрыгон хъайтар училищæйы дæр фыццаг æххуыс куыд кæнын хъæуы, ууыл ахуры кæны. Фæлæ, куыд зæгъы,афтæмæй йæ стырдæр бæллиц у ирвæзынгæнæг суæвын. Училищæйы фæстæ Геор фæнд кæны Æнæнхъæлæджы уавæрты министрады институтмæ бацæуын. Цæмæй йæ бон фылдæр адæмæн баххуыс кæнын уа. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv