Англисаг æвзаджы ахуыргæнæг Браты Алинæ Къостайыхъæуы скъолайы кусы паддзахадон программæмæ гæсгæ

Абон фæндзæмкъласонтæ сты дыргъдоны детективтæ. Фæсивæд ацыдысты æрымысгæ цуаны уырынгонтыл. Цы сасчъыты "ссарынц", уыдоны номхыгъд саразынц æмæ сын сæ хицæндзинæдтæ се 'мкъласонтæн радзурынц. Хуымӕтӕг урок æвиппайды бахъæлдзæг вæййы. Уый ахуыргæнæгӕн йӕ куыстмӕ сфæлдыстадон ахасты руаджы. Браты Алинæ ахуыргæнæгæй 15 азæй фылдæр кусы. Йæ хъуыдымæ гæсгæ, иухуызон уроктæй сывæллон тагъд сфæлмæцы, кæд зонындзинӕдтӕй ӕххӕст вæййынц, уæддæр. Æнæрлæугæйæ грамматикæ ахуыр кæнæн нæй. Урокты хъуамæ уа рæстæг хъæлдзæг ерыстæ æмæ хъæзтытæн дæр. Бæлвырддæр та, сæры магъзы дæр баулæфын фæхъæуы. Йæ сабибонтæй фæстæмæ йæхи уыдта æрмæст ахуыргæнæджы дæсныйады. Урокы темæ скъоладзаутæ бамбæрстой æмæ сфæлхат кодтой. Ныр æрцыд англисаг фольклоры рæстæг, кæсынц аргъау "Джек æмæ хъæдуры хæтæл". Браты Алинæ каст фæци Цæгат Ирыстоны паддзахадон университет. Ахуыры фӕстӕ йӕ уайтагъд ахуыдтой йæ райгуырæн Дигорайы дыккæгæм скъоламæ. Уым 5 азы бакуыста, уый фæстæ йæ амонд Бæтæхъойыхъæуы ссардта. "Хъæууон ахуыргæнæджы" программæйы тыххæй базыдта телевизорæй. Афтæ 4 азы размæ Алинæ йæ куысты бынат Къостайыхъæумæ раивта, сабитæм уарзондзинад та йæ зæрдæйы иудадзыгон у. Фондзазон контракты фæстæ скъолайæ ацæуынвæнд нæ кæны. Уымӕ гӕсгӕ райста кълас дæр. Ныртæккæ разамынд дæтты æстæмкъласонтæн. Уыдонæн скъола сси, æрвылбон кæдæм тагъд кæнынц, ахæм бынат. Ам сæм зæрдиагæй æнхъæлмæ кæсы Алинæ. "Хъæууон ахуыргæнæджы" программæмæ гæсгæ Къостайыхъæуы кусы æрмæст Браты Алинæ. Программæ "Земский учитель" расидтысты 2020 азы. Уæдæй нырмæ куысты бынат ссардтой 40 ахуыргæнæгæй фылдæр. Хъæутæ æмæ чысыл горæтты фæллойгæнæг педагогтæ райсынц иухаттон фиддон милуан сомы бæрц. Дзæдзойты Фатимæ