Джызæлы бæрæг кæнынц Джеоргуыбайы бæрæгбон

Уастырджимæ кувæн къуыри свæййы адæмы иугæнæг. Алчидæр йæ кувинагимæ бацæуы Дзуары бынмæ. Уæларвон зæдтыл йæхи бафæдзæхсы. Не’сфæлдыстадон къорд чысыл раздæр æрбаздæхт Джызæлæй. Федтой, куыд сæмбæлдысты хъæуы цæрджытæ Ирыстоны кадджындæр бæрæгбæттæй иуыл. Джеоргуыбамæ Джызæлы цæттæ кæнын райдайынц рагацау æмæ зæрдиагæй. Хъæуы ис æртæ сæрмагонд кувæндоны. Джеоргуыбайы дзы бынæттон цæрджытæ сæ æртыгай чъиритæ скувынц. Æппæты стырдæр у Уастырджийы кувæндон. Кувæндæттæм Джызæлы цæрджытæ цæуынц æнæхъæн бинонтæй. Хæдзары хистæртæ кувынц æмæ курынц æнæниздзинад, бæлццæттæн та фæрныг æмæ рæсугъд фæндæгтæ. Кувæндонмæ, æнæмæнг, æрбакæнынц сывæллæтты дæр. Джызæлы хистæртæ зæгъынц: хъуамæ хæрз чысылæй райдайой зонын æмæ æмбарын ирон рæсугъд æгъдæуттæ. Цымыдисаг ма нын уыдис уый, æмæ кувæндонмæ изæр цæмæн цæуынц адæм. Ацы фарстайæн дæр нын дзуапп радтой. Къурийы дæргъы, куыд æппæт республикæйы, афтæ Джызæлы дæр бæрæг кæндзысты Джеоргуыба. Адæм кæрæдзимæ цæудзысты. Кувдзысты. Æмæ канд хъæуæн нæ, фæлæ æгас Ирыстонæн дæр курдзысты сабырдзинад, бæркад æмæ бинонтæн фарн. Къуырийы кæрон та уыдзæн Джеоргуыбайы æрвитæн. Хетаг Плиев _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv