Татарстанæй уазджытæ. Сæ республикæйы журналистты къорд ссыд Цæгат Ирыстонмæ. Рагæй сæ фæндыд ахæм балц саразын. Æрзылдысты нæ республикæйы фенинаг бынæттыл, базонгæ сты ирон культурæ æмæ æгъдæуттимæ. Базыдтой  ирон хæринæгты ад дæр. Не сфæлдыстадон къорд уыд семæ. Уазджытæ сын радзырдтой се 'нкъарæнтæ. Татарстанæй журналистты къорд рагæй æнхъæлмæ каст Цæгат Ирыстонмæ абалц кæнынмæ. Æмæ сын ныр бантыст. Аэропортæй фыццаг бацыдысты Беслæны теракты амæттæгты мемориал «Зæдты сахар»-мæ. Æрæвæрдтой дзы дидинджытæ. Дарддæр бабæрæг кодтой Хохы Саниба. Хæхты алæмæты рæсугъддзинад уазджыты зæрдæмæ куыд хъуамæ нæ фæцыдаид. Дыккаг бон журналистты делегаци араст Гæналдоны коммæ. Хъолайы цъити кæм раивылд, уыцы бынат федтой. Бабæрæг кодтой Сергей Бодровы мемориалон фæйнæг дæр, æппæтдунеон хæзнадонмæ хауæг Дæргъæвсы зæппæдзтæ, Сылгоймæгты Алайнаг моладзандон æмæ Уæллаг Фыййагдоны рæсугъд бынæттæ. Фæндагыл-иу æрлæууыдысты арт-объектты раз, истой къамтæ. Экскурсоводтæ сæ зонгæ кодтой алы бынатимæ баст цаутимæ. Дзуапп лæвæрдтой, уазджыты цы фарстатæ сцымыдис кодтой, уыдонæн се 'ппæтæн дæр.    Уæлладжыры комы та бабæрæг кодтой Нузалы аргъуан. Цъæйы та сæрдыгон митыл бадис æмæ бацин кодтой. Цæллагты мæсгуыты бæстыхайы та республикæйы сфæлдыстадон коллективтæ тæтæйраг журналисттæн равдыстой национ кæфтытæ. Уæдæ сæ ирон хæринæгтæй дæр хорз федтой. Ирон фынджы æгъдæуттимæ дæр уазджыты базонгæ кодтой.  Балцы кæронбæттæны  журналистты къорд фембæлд тæтæйраг æхсæнады уæнгтимæ. Дзæуджыхъæуы уынгтыл æрзылдысты, уыдысты Вахтанговы номыл хæдзары дæр. Стæй базыдтой нæ республикæйæн Татарстанимæ цы бастдзинæдтæ ис, уый. Æмæ кæд Ирыстонмæ балц 4 бон едтæмæ нæ ахаста, уæддæр уыцы цыбыр рæстæгмæ уазджытæ базонгæ сты æмæ бауарзтой нæ республикæ. Ирон уазæгуарзондзинад та сæ никуы ферох уыдзæн.