«Æдасдзинады фæдыл», зæгъгæ, мотоциклтыл дугъ ацыд Цæгат Ирыстоны. Мадзал сарæзтой Паддзахадон автоинспекци æмæ клуб «Мото-Осетии»-йы хъæппæрисæй. Акцийы архайджытæ сæ цыд райдыдтой фæндаггон змæлды æдасдзинады падздзахадон инспекцийы разæй. Управленийы сæргълæууæг Моурауты Таймураз мадзалы архайджытимæ кодта профилактикон ныхас, цæмæй фæндаггон змæлды фæтк ма халой, сæ техникæ балцы раз фæлхат кæной æмæ æдас цыд кæной фæндагыл. Уæлдай цæстдард аздæхтой, мотоциклыл цæугæйæ цы уæлæдарæс хъæуы, уымæ. Мотоциклисты хъахъхъæнæн дзаумæтты æппынкъаддæр хай дæр адæймаджы фæндаггон фыдбылызы рæстæг бирæ цæфтæй бахизы. Мотоциклисттæ сæ фæндаг акодтой Беслæны мемориал «Зæдты сахары» уылты. Уым дидинджытæ сæвæрдтой теракты амæттæгты цыртдзæвæны цур. Дарддæр та ацыдысты Алагиры районмæ. Сæ балцы кæронбæттæны та æрурæдтой Барбашовы номыл фæзы. Мадзалы сæйраг нысан уыд фæндаггон змæлд фæхуыздæр кæнын, алыхуызон хæдтулгæты шофырты æхсæн хæлардзинад рæзын кæнын æмæ фæндаггон æдасдзинадмæ фылдæр цæстдард раздахын.