Фæндыры тæнтæ аиваз

Фыццаг телеконкурс «Фæндырмæ» йæ тæмæны бацыд. Стырæй чысылæй алы кары адæм дзы равдыстой сæ арæхстдзинад фæндырыл цæгъдыныл. Сæ фæлтæрддзинад жюрийы уæнгтæн равдыстой Цæгат æмæ Хуссар Ирыстоны курдиатджындæр фæндырдзæгъджытæ. Конкурсы кæронбæттæнмæ рацыдысты 7-æй. Сæйраг приз чи рамбулдзæн уый бæрæг нæма у, фæлæ ныридæгæн фидарæй зæгъæн ис - музыкалон бæрæгбон æнтыстджын кæй рауад, уый. Кæронбæттæнмæ бахауын æнцон хъуыддаг нæу. Уæлдайдæр камерæтæ æмæ софитты рухсыл ахуыр куы нæ уай уæд. Ходы Арсен ахæм егъау конкурсы фыццаг хатт архайы. Тындзы уæлахизмæ, йæ бæллицтæ сæххæст кæнынмæ. Йæхæдæг куыд сæтты афтæмæй кæронбæттæнмæ бахауын æнхъæл нæ уыд. Конкурс арæзт уыд æртæ хайæ. Йæ архайджыты хсæн 5 азæй 88 азы кæуыл цæуы æмæ фæндырыл æнувыд чи у ахæм адæм. Стыр курдиаты руаджы æвзарæн къæпхæнты сæрты чи ахызт уый, фæлтæрдджын музыкант Александр Бондарев. Йæ ныхæстæм гæсгæ йæ ныр уынджы дæр базонынц æмæ йын арфæтæ фæкæнынц. Ирон фæндырмæ хъæрмуд ахастдзинад чи дары уыдоны агуырдтой æгас Ирыстоныл, Цæгатæй-Хуссармæ. Ирддæр курдиат рабæрæг кæнын æнцон нæу. Сæ дæсныйадæн сын аргъ кæнынц культурæйы, аивады радио æмæ телеуынынады кусджытæ. Цымыдисаг равдыстытæ, курдиатджын архайджытæ æмæ фæндыры зæлланг- ахæм уыдзæн конкурсы кæронбæттæн. Къамисы уæнгтæ æмæ нæ телекомпанийы къорды кусджытæ бацæттæ кодтой бирæ сусæгдзинæдтæ фæлæ сæ нырма нæ хъæр кæнынц. Бирæ нал хъæуы, банхъæлмæ кæсæм. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv