Расгуытæн - пайда?

Медицинон æрвонггæнæнтæ фæстæмæ байгом кæнын æмæ сын сæ куыстмæ лæмбынæг æркæсын. Ахæм курдиат балæвæрдтой Паддзахадон думæмæ Астраханы облæсты депутаттæ. Æрвонггæнæн кæддæр уыд Цæгат Ирыстоны дæр. Фæлæ сæ мидхъуыддæгты министрады уынаффæмæ гæсгæ сæхгæдтой. Нозтыл фыдахуыр адæмы ласынц наркодиспансЕрмæ. Фыднозт чи кæны, уыдонæн та байгом кодтой сæрмагонд хайад. Бирæтæ рынчындонмæ дæр бахауынц. Ахæм сыхæгты уындæй иннæ пациенттæ фырцинæй ай-гъай нæ аскъуынынц. Нæ уацхæсджыты æрмæгмæ ма бакæсут. Ацы бæстыхайы раздæр уыд æрвонггæнæн. Хуыздæр æххуысмæ расыг адæм æнхъæлмæ дæр нæ кастысты. Уымæй уæлдай ма, æнæбары фæкастæн агуырдтой æхца. Сæхи дзыппæй. Æрвонггæнæн æрæхгæдтой. Раздæр пъæлицæйы кусæг генерал-майор Сихъоты Сосланы ныхæстæм гæсгæ, пайдайаг нæ уыд. Хъæугæ медицинон æххуыс нæ, фæлæ ма йæ къæхтыл чи нæ лæууы, уый-иу агъуысты скуыси кодтой. Дарддæр æм кæсæг дæр нал уыд. Ныртæккæ нозтыл фыдахуыр чи фæци, уыдоны æрбаласынц республикон наркодиспансЕрмæ. Йæ сæйраг дохтыр куыд зæгъы, афтæмæй медицинон уагдон алцæмæй дæр ифтонг у. Статистикæйы бæрæггæнæнтæм гæсгæ, 3 мæймæ баххуыс кодтой мин æмæ дыууæ сæдæ адæймагæн. Æнæниздзинад хъахъхъæнынады министрады фæнд кæнынц боныгон дзæбæхгæнæн станционар дæр хъæугæ гæрзтæй сифтонг кæнын. Уырдæм дæр бануазыны фæстæ кæцыдæртæ сæ фæндаг акæнынц. Мидхъуыддæгты министрады æмбарын кæнынц, расыг адæмы, дам, пъæлицæмæ нал ласæм. Уынджы йæ къæхтыл чи нал лæууы, ахæмы куы ссарынц, уæд ын тагъд æххуысы машинæмæ фæдзурынц. Цалынмæ уыдон цæуынц, уæдмæ барадхъахъхъæнджытæ дæр æнхъæлмæ кæсынц. Уый дæр фæзминаг хъуыддаг нæу. Цалынмæ профилон хайæдты уынаффæтæ хæссынц, уæдмæ та уал нозтджын адæмæн сæ тъæпп хуымæтæг рынчындæттæм фæцæуы. Расыгимæ абухын та, цы йæ `мбæхсæм, нæдæр дохтырты фæнды, нæдæр, йе `нæниздзинад чи фидар кæны, уыдоны. Гогаты Марат _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv