Аивæдты колледжы оркестр сси адæмон инструментты конкурсы фыццаг премийы лауреат

Дзæуджыхъæуы Гергиты Валерийы номыл аивæдты колледжы оркестр сси адæмон инструментты конкурсы фыццаг премийы лауреат. Æркаст цыд Уæрæсейы Хуссар федералон зылды музыкалон колледжыты `хсæн. Æдæппæтæй дза архайдтой 11 къорды. Жюрийы уæнгтæ алы горæтты æвзæрстой конкурсы архайджыты. Ацы фæсивæды къухты алы инструменты зæлтæ дæр уæлдай рæсугъд азæлынц. Адæймаджы сæхимæ 'лвасынц. Дзæуджыхъæуы адæмон инструментты оркестр кусы бирæ азты дæргъы. Йæ музыканттæ куыд зæгъынц, афтæмæй адæмон сфæлдыстадмæ уарзондзинад æмæ сæ лæмбынæг куыст баххуыс кодтой оркестрæн ног бæрзæндтæм схизын. Гуриаты Руслан, Гергиты Валерий номыл аивæдты колледжы студент: «Æрæджы дæр ма нæ хъуыдыйы дæр нæ уыд, ахæм егъау конкурсы нæхи равдисын нæ бон кæй суыдзæнис, уый. Фæлæ, нын нæ ахуыргæнджытæ нæ размæ стыр хæс сæвæрдтой. Æмæ нæхи зæрдиагæй бацæттæ кодтам». Колледжы студентты ныхæстæм гæсгæ, оркестры инструментты руаджы композиторы хъуыды равдисын æнцондæр у. Конурсы архайджытæн сæ фылдæр цы инструменттыл цагътой, уыдон сæ профилон дæсныйадмæ нæ хауынц. Уымæ гæсгæ сын сæ уæлахиз уæлдай зынаргъ у. Гуриаты Руслан, Гергиты Валерийы номыл аивæдты колледжы студент: «Оркестры æмæ соло цæгъдын - иухуызон хъуыддæгтæ не сты. Оркестры цæгъдгæйæ адæймаг æмбары иннæтимæ, стæй дирижеримæ баст кæй у дæ куыст, уый. Мæнмæ гæсгæ, уый тынг ахсджиаг хъуыддаг у». Уæрæсейы хуссары адæмон инструментты оркестрты конкурс уыд фарон декабры. Архайдтой дзы 11 сфæлдыстадон къорды. Сæ курдиатæн сын аргъ кодтой бæрзонд æмвæзадыл. Уæлдай æргом æздæхтой куыд арæхстдзинад, афтæ конкурсы программæ сценикон æгъдауæй куыд æххæстгонд у, уымæ. Абойты Хетæг, оркестры дирижер: «Тынг æхсызгон нын у, нæ куыстæн нын стыр аргъ кæй скодтой. Фæнды мæ бузныг зæгъын оркестры æппæт архайджытæн дæр. Студенттæ, адæмон хайады ахуыргæнджытæ. Мах сæрыстыр стæм, ахæм бæрнон жюри цы конкурсы ис, уым кæй фæуæлахиз стæм. Мæнмæ гæсгæ, уый ууыл дзурæг у æмæ ма нæ къухы бирæ æнтысдзинæдтæ бафтдзæн. Дарддæр дæр нæ арæхстдзинадыл кусдзыстæм». Уыимæ ма, конкурсы æвзæрстой адæмон инструементты хуыздæр инструментовка дæр. Фыццаг бынат саккаг кодтой дирижер Абойты Хетæджы инструментовкæйæн. Гæздæнты Еленæ, Гергиты Валерий номыл аивæдты колледжы адæмон: инструментты хайады ахуыргæнæг: «Оркестр студенты ахуырадыл хуыздæрырдæм ахады. Алыхуызон инструменттæ хъусгæйæ баян, аккордеон æмæ бирæ æндæртæ, сæ дæсныйад дæр уæлдæр кæны. Алчи дæр дзы тынг цымыдисæй архайы». Колледжы студенттæ æппынæдзух сæ дæсныйад фæуæлдæр кæныныл архайынц. Ныр дæр сæхи ног уæлахизтæм цæттæ кæнынц. Фидæны сæм æнхъæлмæ кæсы адæмон инструментты оркестрты регионалон конкурс. Ныфс сæ ис, æнтыстджынæй дзы кæй равдисдзысты сæхи, уымæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv