Ирон театры артисттæ равдыстой спектакль Сунжæйы

Цæгат Ирыстоны Тæбæхсæуты Балойы номыл Ирон академион театры артисттæм разынд хорз хъуыды. Ныр сæ спектакльтæ æвдисынц районты дæр. Ахæм хæс сфæлдыстадон къордты размæ сæвæрдта республикæйы сæргълæууæг Битарты Вячеслав дæр. Æмбæлгæ хæслæвæрд та къорды размæ сæвæрдта Театры аивадон разамонæг Колыты Владислав. Уыцы фæтк адæмæн пайда у. Артистты фенынмæ та алчидæр фæбæллы. Ацы хатт сценæйы дæснытæ абалц кодтой Горæтгæрон районмæ. Сунжæйы сæ курдиаты зынгæй ныррухс скъолайы спортивон зал. Сунжæйы 2-æм скъоламæ Ирон Академион театры артисттæ абалц кодтой фыццаг хатт. Сывæллæттæ сæ равдыстмæ ахæм цымыдисæй кæй кæсдзысты, уый æнхъæл дæр нæ уыдысты. Музыкалон-литературон композици сæвæрынмæ сæхи хорз бацæттæ кодтой. Хетæгкаты Къоста йæ рæстæджы кæуыл æмбæлд, йæ сагъæстæ, йæ хъуыдытæ кæмæн дзырдта, йе`стыр бæллицтæ кæимæ дих кодта, уый уыдис Байаты Гаппо. Уыдоны кадæн абон сарæзтой сæрмагонд фембæлд. Театралон мадзал снысан кодтой Хетæгкаты Къостайы 160 азы юбилеймæ. Уый тыххæй бæрæгбоны агъоммæ арæзт цæуынц алыхуызон рæсугъд æмæ пайда мадзæлттæ. Абон ам, сывæллæттæн сæ курдиат раргом кæнынæн дæнцæгæн хæссинаг уыдысты ацы курдиатæй хайджын адæм.  Скъолайы ахуыргæнджыты хъуыдымæ гæсгæ, ахæм мадзæлттæ хорз ахъаз сты рæзгæ фæсивæды хъомыладæн. Бирæты, абоны равдысты фæстæ, артист суæвын æрфæндыд. Уыимæ ма ахады ирон литературæйы бындурæвæрджыты Цæгат Ирыстоны паддзахадон театры артисттæ сæ уды хъарм дарддæр дæр рæдауæй дæтдзысты адæмæн. Уæлдай нæу, паддзахадон театры сценæмæ рацæуай, æви скъолайы чысыл бæстыхайы ахъазай. Сæйрагдæр сын у, аивадуарзджыты зæрдæтæ балхæнын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv