Зыдгæнæг - фыдгæнæг!

Зæронд Бæтæхъойыхъæуы цур ацы зымæг фæзынд цалдæр ног цады. Чи зоны æмæ йыл чидæртæ бацин кодтой. Фæлæ сау-сауид сты. Сæ мидæг та – нефть. Къуыримæ цадты арф сси метры рдæджы бæрц. Ныр хъæуы алыварс фæзуæттыл чъизи мит, кæрдæг æмæ нефт сæмхæццæ сты. Афтæмæй та ам хизынц цæрджыты фос. Адæм тæрсынц, сæ фос чъизи кæрдæгæй куы фæхъæстæ уой, кæнæ сау цады куы ныххауой, уымæй. Уый иу хъуыддаг у. Уæлдай тæссаг та уымæй у æмæ нефть ахъардта быдыртæм. Ныридæгæн дзы кæрдæг нал зайы. Хор дзы уæвгæ схæца, уый зын зæгъæн у. Фосы æмæ зæххы хæйтты хицæуттæ фæдисы хъæр кæнынц. Нефть апарахат 1000 гектары фæзуатыл. Хъæуы ныртæккæ кусы сæрмагонд къамис. Аразынц хъæугæ мадзæлттæ. Фæлæ нефть уæддæр кæлы. Иу нефтцъирæнæй ныр дæр ма парахатæй хъары цавæрдæр тæнгъæд Специалисттæ чъизи зæхх арвыстой лабораторимæ. Бæрæг кæнынц, донмæ цы буаргъæдтæ бахаудысты, уый дæр. Ацы фарстайыл кусын райдыдтой 6 боны размæ. 25-æм январы Æрдзмæ цæстдарды Управленимæ чидæр æрбадзырдта, Зæронд Бæтæхъойыхъæуы нефт кæлы, зæгъгæ. Æрдз æмæ барадхъахъхъæнджытæ, стæй бынæттон администрацийы специалисттæ æркасты уавæрмæ. Куыд сбæрæг кодтой, афтæмæй нефтцъирæнтæ сты куыстуат «Меркурий»-йы бæрны. Слестгæнджыты иу хъуыдымæ гæсгæ, хæтæлтæ базæронд сты æмæ кæм асастысты, уырдыгæй тæнгъæд кæлы. Уæдæ нефтимæ кусыны домæнтæ æххæстгонд кæй нæ уыдысты, уый дæр бæрæг у. Фæлæ куыстуаты минæвæрттæ сæхæдæг хъыгдардбаййафджытæ сты. Заманхъулы нефты гуырæнтæ специалисттæ рабæрæг кодтой 60 азы размæ. Компани дзы кусы 10 азы бæрц. Кæд дзы раздæр 200 нефтцъирæны уыд, уæд ныр 6 йеддæмæ не сты. Уыдонæй дæр нефт йæхи æгъдауæй кæлы, æнæ цъирæнтæй. Компанимæ лицензи дæр ис, æппæт домæнтæ дæр æххæст кæнынц. Фæлæ компанийы ис, æвзæр чи кусы æмæ домæнты сæрты чи ахизы, ахæм кусджытæ. «Нæхæдæг дæр иу хъуыддаг бафиппайдтам – компанийы хицауадæй гуырæнты куы ничи вæййы, уæд нефты бæрц дзæвгар фæкъаддæр вæййы. Сæвæрдтам камерæтæ. Æмæ куыд рабæрæг, афтæмæй ныл нæхи хъахъхæнджытæ гадзрахатæй рацыдысты. Æхсæвыгæтты-иу нефть давтой», – загъы æнæххæстбарджын æхсæнад «Меркурий»-ы генералон директоры хæдивæг Тамерлан Юханов. Компани цы тæнгъæд цъиры, уымæн йæ 95% дон у, иннæ нефть. Давджытæ иу æй калдтой зæхмæ, æнхъæлмæ-иу кастысты, дон зæхмæ куы ацæуа, уымæ. Цы нефть-иу баззад, уый-иу æмбырд кодтой. Фыццаг хатт фæливджыты рабæрæг кодтой 2017-æм азы. Уæ сæ сæ къухæй æрцахстой. Ныртæккæ компанийы æппæт хъахъхæнджытæ дæр давыныл кæй фæцалх сты, ууыл басастысты. Специалисттæ байгом кодтой уголовон хъуыддаг. Иннæ, административон хъуыддагмæ кæсынц тæрхондоны. Къуырийы фæстæ эксперттæ фехъусын кæндзысты зæххы уæлцъары æмæ доны анализты бæрæггæнæнтæ. Уæд сбæлвырд уыдзæн, давджытæ цас зиан æрхастой, уый. Мæйы `мгъуыдмæ та хъуамæ сбæрæг уа, зæхх сног кæныны мадзæлттæ чи, куыд æмæ кæд æххæст кæндзæн, уый. Зыхъуаты Жаннæ _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv