Æрæфы районы байгом кодтой культурæйы ног хæдзар æмæ Урухы цæугæдоны сæрты ног хид

Цæгат Ирыстоны сæргълæууæг Битарты Вячеслав бабæрæг кодта Æрæфы район. Æхсæрысæры кадджын уавæры байгом кодтой культурæйы ног хæдзар. Сарæзтой йæ национ проекты фæлгæты. Цалцæггонд ма æрцыд Урухы цæугæдоны сæрты хид. Сарæзтой йæ федералон программæ гæсгæ. Ног хид фадат ратдзæн туристты нымæц фæфылдæр кæнынæн. Йæ хæрзхъæддзинадмæ аздæхтой уæлдай æргом. Битарты Вячеславимæ Æрæфы районмæ араст нæ уацхæссæг Хуасдзауты Алинæ. Бакæсæм йæ æрмæгмæ. Æхсæрысæры уыд стыр бæрæгбон. Кадджын уавæры дзы байгом кодтой культурæйы ног хæдзар. Сарæзтой йæ национ проекты фæлгæты. Бахардз ыл кодтой 33 милуан сомы. Арæзтадон куыстытæ райдыдтой 2018 азы. Ныронг Æхсæрысæры культурæйы хæдзар нæ уыд. Уыцы æхсызгон хабары фæдыл Битарты Вячеслав цæрджытæн арфæйы ныхæстæ ракодта. Кадджын мадзалмæ гæсгæ культурæйы хæдзары сарæзтой хъæлдзæг концертон программæ. Республикæйы сæргълæууæг федта, ныр сабитæн цавæр уавæртæ уыдзæн, уый. Ис дзы концертон зал 100 бынатæн. Сывæллæтты бон дзы уыдзæн ахуыр кæнын кафын æмæ зарыныл. Гримеркæтæ æмæ дзаумæттæ ивæн бытæттæ куыд чызджытæн, афтæ лæппутæн дæр. Æхсæрысæры хъæуы культурæйы артдзæст кæй фæзындис, уымæ рагæй æнхъæлмæ кастысты йæ цæрджытæ дæр. Куыд сывæллæттæ, афтæ хистæр кары адæм дæр. Культурæйы хæдзары сфæлдыстадон къордты нымæц фæфылдæр кæныныл районы администраци архайдзæнис. Дарддæр Битарты Вячеслав йæ фæндаг акодта Хæзныдонмæ. Æрæджы дзы егъау арæзтадон куыстытæ кæронмæ æрхæццæ сты. Сарæзтой дзы ног хид федералон программæ гæсгæ. Хид иу кæны районы цалдæр хъæуы. Арæзтадон куыстытæ баххæст кодтой цыбыр рæстæгмæ. Хæрзхъæддзинадмæ æздæхтой уæлдай æргом. Куыстытæ æххæстгæнæг компанийы минæвæрттæн, районы хицауад, стæй нæ республикæйы фæндаггон хæдзарады комитетæн Битарты Вячеслав ракодта арфæйы ныхæстæ. Балæвар сын кодта кады гæххæтытæ æмæ арфæйы фыстæджытæ. Фæбæрæг кодта, сæ куыст ахсджиаг æмæ хъæугæ кæй у, уый. Ног хиды руаджы ма районы туризмы рæзт дæр фæхуыздæр уыдзæнис. Ног хидыл бахардз кодтой 22 милуан сомы. Донивылдтæ æмæ тæрккъæвдаты рæстæг йын тæссаг ницæмæй у. Йæ дæргъ у 120 метры. Цыколай культурæйы хæдзары та нæ республикæйы сæргълæууæг Ног азы бæрæгбоны фæдыл арфæтæ ракодта районы алы къабæзты хуыздæр кусджытæн. Се 'хсæн ахуырад, культурæ, хъæууон-хæдзарад. Битарты Вячеслав фæбæрæг кодта, нæ республикæйы рæзтмæ стыр æвæрæн сæ куыстæй кæй хæссынц, уый. Балæвар сын кодта кады гæххæтытæ, арфæйы фыстæджытæ. Дыууæйæн та саккаг кодта нæ республикæйы сгуыхт кусджыты ном. Дарддæр дæр Битарты Вячеслав нæ республикæйы районты хуыздæр кусджыты хорзæхджын кæндзæни. Райсом абалц кæндзæни Горæтгæрон районмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv