Шанайты Аидæ фехъусын кодта, йæ спортивон карьерæ кæй фæцис, уый тыххæй

Стыр спортæй ацыд, фæлæ йæ фæстæ ирд фæд ныууагъта. Шанайты Аидæ журналисттæн фехъусын кодта, йæ спортивон карьерæ кæй фæцис, уый тыххæй. Олимпаг чемпионкæ, Европæ æмæ дунейы чемпионкæ фехтованийæ, Уæрæсейы сгуыхт мастер ахæм уынаффæ рахаста йæ къах цæф кæй æрцыдис, уый тыххæй. Уæ зæрдыл уын æрлæууын кæндзыстæм, Аидæйы къах хъыгдард баййæфта 2016 азы Олимпиадæйы. Бирæ рæстæг йæхи сдзæбæх кæныныл архайдта. Фарон та сфæнд кодта ногæй йæ тыхтæ бавзарын. Фæлæ йæ бамбæрста, зын йын кæй у ногæй спортæй архайын,уый. Дарддæр цы кусдзынæ, зæгъгæ фарстайæн дзуапп радта- мæ бинонтæ æмæ мæ сывæллæттæм фылдæр æргом аздахдзынæн. Йæ спортивон карьерæ кæронмæ кæй æрхæццæ ис, уый тыххæй ма фехъусын кодта дунейы дыууæ хатты чемпион кикибоксингæй Айлярты Тимур. Йæ социалон хызæджы сыфыл спорстмент бузныджы ныхæстæ загъта, чидæр йын æххуыс кодта æмæ йыл кæй зæрдæ рысти бирæ азты дæргъы, уыдонæн. Куыд загъта, афтæмæй йæ спортивон фæндаг рауад ирд. Бирæ кадджын адæмимæ сæмбæлд. Кæд иу алкæд йæ къухы уæлахиз нæ бафтыд, уæддæр дарддæр уæлдæр къæпхæнтæм уæндон къахдзæфтæ кæддæриддæр кодта. Бирæ фæндтæ æмæ хæстæ ма æвæрдта йæ размæ. Фæлæ, йе нæниздзинады уавæр зæрдæхсаинаг кæй сси, уый аххосæй йын рингмæ цæуæн нал ис. Спортсмен куыд фæбæрæг кодта, афтæмæй ахæм уынаффæ æнцонтæй нæ рахаста. Уырны йæ, æрыгон æмæ куртиатджын спорстемнтæ нæ республикæйы бирæ кæй ис, уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv