Республикæйы кæронмæ æрхæццæ æппæтуæрæсеон фестиваль футболæй «Мы в игре. Лето», зæгъгæ. Арæзт цæуы чызджыты æхсæн. 100 спортсменкæйæ фылдæр Цæгат Ирыстоны алы районтæй бавзæрстой сæ тыхтæ ацы спорты хуызы. Æрыгон чызджытæн сарæзтой дæсныйадæвдисæн ахуыртæ дæр. Сæ хуыздæртæн та фадат уыд зындгонд командæ «Академия футбола»-мæ бахауын.  Фестивалы тыххæй уын бæлвырддæр радзурдзыстæм нæ дарддæры æрмæджы. Ацы æрыгон чызджытæн сæ цæстытæ ферттивынц, футболæй куы фæхъазынц, уæд. Сæ зæрдæты арф æвæрд у ацы спорты хуыз, уый бæрæг у. Кæд нырма æвзонг сты, уæддæр æй æмбарынц, цæмæй рамбулой, уый тыххæй бирæ кусын хъæуы. Ахуырæй уæгъд рæстæг зæрдиагæй нывонд кæнынц сæ уарзон спортивон хъазтæн. Спортивон скъола «Академия Алания» сын хорз гæнæнтæ сарæзта. Сарæзтой дзы фестиваль «Мы в игре. Лето». Цæуы нæ бæстæйы 32 горæты. Æрвылаз сæ нымæц фылдæрæй - фылдæр кæны. Цæгат Ирыстоны алы районтæй дзы бацархайдтой 100 чызджы. Профессионалтæ сын бацæттæ кодтой дæсныйадæвдисæн ахуыртæ, футболы ветерантæ сын балæвар кодтой ног фæлтæрддзинад. Сылгоймæгты æхсæн футбол азæй-азмæ парахатдæр кæны. Ацы фестиваль дæр уымæн у æвдисæн. Архайынц дзы 7 азæй 12 азы онг кæуыл цæуы, ахæм чызджытæ. Фæзыл, пуртийыл тох кæнгæйæ, æвдисынц спортивон удыхъӕд. Фæлтæрдджын спортсменкæты æмрæнхъ фыдæбон кæнынц. Футболы фестивалы руаджы спортсменкæтæн фадат ис куыд фæзыл сæ тыхтæ бавзарын, афтæ ма «Футболы академийы» стыр командæйы хай дæр суæвынæн. Ам æппынæдзух агурынц курдиатджын футболуарзаг фæсивæды. Уæлдай тынг та æнхъæлмæ кæсынц чызджытæм.