«Газпром газораспределение Владикавказ»-ы специалисттæ сарæзтой рейд

Республикæйы газы службæйы специалисттæ арæх аразынц рейдтæ. Бирæ пайдагæнджыты хæстæ 100 мин сомæй фылдæр сты. Се 'хсæн сты бирæсывæллонджын æмæ æххуысцух бинонтæ. Фæлæ, закъонмæ гæсгæ сын хъуамæ специалисттæ газы хæтæлтæ алыг кæной. Специалисттимæ рейды ацыд не 'сфæлдыстадон къорд дæр. Бæлвырддæр радзурдзæн Хуасдзауты Алинæ. Ацы хæдзары æрдзон газы хæстæ сты 100 мин сомы бæрц. Ахæм хæстимæ пайдагæнджытæ районы сæдæйæ фылдæр сты. Газы службæйы специалистты ныхæстæм гæсгæ, сæ фылдæр сты бирæсывæллонджын æмæ æххуысцух бинонтæ. Сæ уавæр сын бæргæ æмбарынц, фæлæ закъоны ныхмæ сæ бон ницы у. Адæм сæ хæстæ куы нæ бафидынц, уæд сын специалисттæ сæ газы хæтæлтæ алыг кæнынц. Баситы Арвид, «Газпром газораспределение Владикавказ»-ы Горæтгæрон районы хайады специалист: «Хæтæлтæ алыг кæнæм æндæр хуызы сын æй нæ бон бамбарын кæнын нал вæййы, уæд. Кусæм сæрмагонд номхыгъдмæ гæсгæ. Сарæзтой нын æй бынæттон хайады. Ацы мæйы хыгъды нæм ис 745 адæймаджы. Дарддæр дæр семæ кусдзыстæм». Газы хæтæлтæ алыг кæныны размæ уал специалисттæ адæмæн раттынц сæ фиддонты тыххæй гæххæттытæ. 20 боны æмгъуыдмæ сын бар ис сæ хæстæ бафидын. Уыимæ ма, сæ бон у фиддонтæ хайгай баххæст кæнын дæр. Баситы Арвид, «Газпром газораспределение Владикавказ»-ы Горæтгæрон районы хайады специалист: «Рейды архайы кассир дæр. Ацæуы сæрмагонд кассæимæ. Пайдагæнæджы бон у йæ хæсы 30 проценты бафидын бадзырд бафыссгæйæ. Уæд æнæ газæй нæ баззайдзæн». Уыимæ ма, йæхи барæй йæ хæдзармæ цъæх артаг чи бауадзы, ахæмтæ дæр бирæ сты. Фарон рабæрæг кодтой минæй фылдæр закъонхалæджы. Батрадз Хъæлыцты, «Газпром газораспределение Владикавказ»-ы пайдагæнджытимæ кусыны хайады генералон директоры хæдивæг :«Абоны онг газ чи давта, уыдоны æфхæрдтам административон æгъдауæй. Уæрæсейы закъæттæ кæй фæкарздæр сты, уымæ гæсгæ йæ уынæм ныр уголовон æгъдауæй дæр æфхæрæн кæй ис закъонхалджыты». Газы кусджытæ рейдтæ арæх аразынц. Пайдагæнджытимæ æмбарынгæнæн куыст дæр кæнынц. Йæ хæстæ чи нæ фиды, уыдонимæ кусынц къæпхæнгай. Фыццаг уал сын æрвылбон сæ фиддонтыл æфтауынц пеня. Стæй, уый фæстæ сæ кæд нæ бафидой, уæд сын газ алыг кæнынц. Фиддонтæ куы нæ баххæст кæной, уæд та сæ тæрхондоны æххуысæй бадомынц. Арæх пайдагæнджытæ зонгæ дæр нæ фæкæнынц сæциалон льготæтты тыххæй. Уыимæ ма, хæстæ бафидыны фæтк раивыны фадат кæй ис, уый дæр. Уыцы информаци дæр сын газы службæйы специалисттæ фехъусын кæнынц. Хуасдзауты Алинæ, Гаглойты Габриеллæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv