Рахизфарсы районы поликлиникæ сарæзтой 1989 азы æмæ уæдæй нырмæ бындуронæй цалцæггонд никуы уыд. Ацы аз мартъийы медицинон уагдон ног кæнын райдыдтой. Дохтыртæ сæ куыст рæстæгмæ æндæр бæстыхаймæ раивтой. Кусæнгæрзты уынæр иу уысм дæр не 'нцайы. Ам бирæ куыст ис — æппæт уæладзгуыты дæр хъæуы пъолтæ райхалын, уымæй уæлдай, æхсæнкъултæ, асинты фæзуæттæ æмæ техникон уæладзыг дæр. Бæстыхайы сæр уыдзæн цатыры хуызы æмбæрзт. Бынаты архайынц 26 адæймаджы. Айсдзысты зæронд лифттæ, сæ бæсты ногтæ сæвæрдзысты. Сараздзысты ма дзы уæзласæн лифт дæр. Рахизфарсы районы поликлиникæйы бæстыхайы рацарæзт фыццаг къæпхæн у. Дыккаг къæпхæн — поликлиникæйы административон бæстыхайы арæзтад. Проектмæ гæсгæ дзы уыдзæн æртæ уæладзыджы, иу та ма зӕххы бын. Нырма уал ын бындур скодтой. Куыстытæ æххæстгæнгæйæ, зындзинæдтимæ дæр сæмбæлдысты. Ныртæккæ архайынц фæткмæ гæсгæ. Хæстæгдӕр рæстæг райдайдзысты бетон кæнын. Куыстытæм бавнæлдтой ацы аз мартъийы. Дохтыртæ уал пациентты исынц Рахизфарсы районы рынчындоны дыккаг дзæбæхгæнæн корпусы. Иу сменæмæ ардæм æрбацæуы 600 адæймаджы онг. Рацарæзт цæуы «Æнæниздзинад хъахъхъæнынады райрæзты» паддзахадон программæмæ гæсгæ. Куыстытæ фæуынвæнд кæныныц иннæ аз декабры. Ам уыдзæн сывæллæтты поликлиникæ æмæ дæндæгтæ дзæбæхгæнæн хайад дæр. Сног кæндзысты медицинон ифтонггæрзтæ: КТ- æмæ рентген-аппараттæ.