Мидхъуыддæгты министрады уыдис адæмон дружинæты минæвæрттимæ фембæлд

Мидхъуыддæгты министрады управленийы æхсæнадон советы уæнгтæ фембæлыдысты адæмон дружинæты минæвæрттимæ. Фембæлды ныхас цыд адæмон дружинæты куыстыл. Æхсæнадон советы сæрдар Анатолий Позмогов стыр аргъ скодта, дружинниктæ пъæлицæйæн цы æххуыс кæнынц, уымæн. Сæ хæс у горæты æхсæнадон фæткмæ кæсын, профилактикон куыст æмæ рейдтæ аразын. Æмбырды архайджытæ ма сбæлвырд кодтой, дарддæр дæр пъæлицæ æмæ дружинникты æмгуыстад куыд араздзысты, уый. Фембæлдмæ æрбахуыдтой Финансон университеты Дзæуджыхъæуккаг дæлхайады студентты дæр. Радзырдтой сын, цæмæй хорз у дружинник уæвын æмæ цы пайда у сæ куыст. Ахуырдзаутæ ма базонгæ сты дружинник суæвыны домæнтимæ дæр. Пъæлицæйæгты ныхæстæм гæсгæ, æмгуыстад тынг ахады горæты уынгты æмæ æхсæнадон бынæтты закъонхалджыты уромыныл. Æхсæнадон советы уæнгтæ рахастой уынаффæ, хæстæгдæр рæстæджы патрулон службæйы кусджытимæ рейдтæ саразын. Ныхас цæуы профилактикон мадзæлтты фæлгæты цæхæрадæтты æмбаладтыл æрзилын æмæ адæмæн исбон давыны хъуыддæгты тыххæй радзурын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv