Тагъд рæстæджы Дзæуджыхъæуы уынгтæм рацæудзæн фылдæр ног трамвайтæ. Нырыккон вагонты адӕймагӕн йӕ балц у æхсызгон æмæ æнцонвадат. Æмæ куыд нæ? Ӕхсæнадон транспортыл сбад, ӕмӕ уым та ис интернет, телефон электрон тыхмæ баиу кæныны фадат æмæ æндæр ногдзинæдтæ. Уæдæ шофырты куыст дæр фенцондæр. Фыццаг уал æнæмæнг хъæуы сбæрæг кæнын рухсытæ æмæ дзæнгæрæджы куыст, дарддæр — хъармгæнæнтæ, уромæн æмæ дуæрттæ. Сæ куысты къуылымпыдзинæдтæ хъуамæ ма уа. Æрмæст уæд рацæуы трамвай горæты уынгтæм. Архайд æнцондæр вӕййы сæрмагонд программæйы фæрцы. Горæты цæрджытæ ног трамвайтыл сахуыр сты. Модель 71-412 арæзт у «Уралтрансмаш»-ы. Ныртæккæ ма фæндæгтæм рацæуынмæ цæттæ кæнынц дыууæ вагоны. Уый фæстæ райдайдзысты цæттæ кæнын ноджыдæр фондз. Республикæмæ сæ сластой дыууæ къуырийы размæ. Бынаты кусынц «Уралтрансмаш», «ЭПРО» æмæ «Вега»-йы куыстуæттæ. Техникон ногдзинæдтыл Санкт-Петербургы специалисттæ ахуыр кæнынц «Владтрамвай»-ы минæвæртты. Хъуамæ бацæттæ кæной барæн фæрæзтыл æмæ автоматикæйыл кусæг слесырты. Куыстуаты ис трамвай тӕрыныл ахуыртæ. Теоретикон зонындзинæдтæ та райсæн ис 7-æм профессионалон техникон училищæйы. Ам амонынц фæндаггон змæлды фæтк, æдасдзинады домæнтæ. Хъæрджынты Светланæ трамвайы шофыр у ныр 30 азæй фылдæр. Йæ куыст уарзы. Депо у ноггонд. Ис дзы 28 ног трамвайы. Горæты уынгтæм ныртæккæ рацæуы 14 ног æмæ 2 зæронд вагоны. Шофыртæ сты 42-йæ, сахуыр ма кæндзысты 16 адæймаджы.