РЦИ-Аланийы паддзахадон автоинспекцийы кусджытæ сарæзтой профилактикон мадзал

Цæгат Ирыстоны паддзахадон автоинспекцийы кусджытæ сарæзтой профилактикон мадзал. Йæ сæйраг нысан - бæлццæтæ чи ласы, уыцы шофыты цæттæдзинад сбæрæг кæнын. Уыимæ ма автобусты шофыртæ фæндаггон фæткы домæнтæ куыд æххæст кæнынц, уый дæр раиртасын. Федтой ма хæдтулгæтæй дæрддзæф бынæттæм чи цæуы, уыдоны техникон уавæр дæр. Уыимæ ма иртæстой автобусты æмæ маршутон такситы конструкцийы ивддзинæдтæ, паддзахадон автоинспекцийы нысангонд чи не’ рцыд, уыдон. Куыст фылдæр цæуы фæндаггон фыдбылыз æрцæуынæй тæссагдæр ран кæм у, уыцы фæндаджы уадздзагтыл. Инспектортæ уæлдай æргом здахынц нæ бæстæйы æндæр горæттæм бæлцæтты чи ласы, уыцы шофыртæ куысты æмæ улæфыны фæтк куыд æххæст кæнынц, уымæ. Бæлцæтты чи ласы, уыдоны сæйраг хæс у - адæмы нысангонд бынатмæ æдасæй æмæ æнæ къуылымпытæй фæхæццæ кæнын. Уый тыххæй та шофыртæ хъуамæ куысты æмæ улæфты фæткмæ куыд фæндыйы цæстæй ма кæсой. Фылдæр хатт фæндаггон фыдбылызтæ æрцæуынц, шофыртæ кæй бафæллайынц, уый тыххæй. Ацы фæтк чи не `ххæст кæны, уыцы шофырты ивар кæндзысты мин сомæй 3 мин сомы онг. Мадзалы фæлгæты ма инспектортæ сбæрæг кодтой Дзæуджыхъæуæй Мæскуымæ цы автобустæ араст вæййынц, уыдон дæр. Фыццаджыдæр инспектортæ федтой шофырты бардæттæг гæххæтытæ æмæ хæдтулгæты техникон уавæр. Ахæм басгæрсты руаджы ма рабæрæг вæййынц æнæзакъонæй ацы лæггæдтæ чи кæны, уыдон. Фылдæр хатт ахæм хуызы чи кусы, уыцы шофырты тыххæй æрцæуы фæндаггон фыдбылызтæ. Мадзалы фæлгæты ма паддзахадон автоинспекцийы кусджытæ бæлццæтæн æмбарын кодтой, цæмæй æнæзакъонæй чи архайы, уыцы куыстуæтты лæггæдтæй ма пайда кæной. Инспектортæ куыд зæгъынц, афтæмæй дарддæр дæр ахæм мадзæлттæ араздзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv