114 азы æххæст Багаты Хъæвдыны фырт Никъалайы райгуырдыл

114 азы æххæст кæны Багаты Хъæвдыны фырт Никъалайы райгуырдыл. Абон æй йе`мбæлттæ, хиуæттæ æмæ къабæзтæ æрымысыдысты. Дзæуджыхъæуы йæ номыл цы мемориалон фæйнæг байгом кодтой, уымæ адæм æрбахастой дидинджытæ. Багаты Никъала уыд куырыхон ахуыргæнæг æмæ дæсны филолог. Ирон æвзаджы æрдзон æууæлтæ ничи зыдта йæхицæй хуыздæр. Йæ грамматикæ сæ æвдисы æппæтæй нывылдæр æмæ бæстондæр. Никъала ахуырдзаутæн уарзын кодта мадæлон æвзаг, фыдыбæстæ æмæ рæсугъддзинад. Райгуырд Хуссар Ирыстоны Цъусгомы. Йæ куыст райдыдта 1925 азæй. 1977-æм азмæ куыста Цæгат Ирыстоны паддзахадон пединституты, ныртæккæйы ЦИПУ. Багаты Никъала уыд ирон æвзаджы ахуыргæнæг, ирон æвзагзонынады кафедрæйы сæргълæууæг. Фæстæдæр та - æвзаг æмæ литературæйы факультеты декан. Хæсты рæстæг куыста Цæгат Ирыстоны ахуырады коммисариаты. Хорзæхгонд уыд «Кады Нысанæй» æмæ К. Д. Ушинскийы номыл майданæй. Бирæ лæггæдтæ бакодта ирон æвзагæн. Йæ алыхуызон фæллæйттæй фыццаг рады банысан кæнын хъæуы, ирон скъолатæн цы ирон чингуытæ сарæзта, уыдон. Ирыстоны сабитæ ирон æвзаджы грамматикæ уыцы чингуытæй ахуыр кодтой дæс æмæ ссæдз азы дæргъы. Æмæ нырмæ дæр рох не сты. Йæ ахджиаг æмæ зынгæ куыст у дыууæ томæй арæзт ахуыргæнæн чиныг «Нырыккон ирон æвзаг» - æппæты арф æмæ æххæст афæлгæст ирон æвзагонынады алы æмвæзадыл дæр, нырмæ дæр ма ирон æвзаг иртасджытæ æмæ филологтæ кæуыл æнцайынц, ахæм. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv