Июны республикæмæ ноджыдæр æрхæццæ уыдзæн 4 ног трамвайы. Ныртæккæ горæты уынгтӕм рацӕуынц 24 ног вагоны. Уый тыххæй æрвылкъуырион аппаратон æмбырды фехъусын кодта Дзæуджыхъæуы администрацийы сæргълæууæг Милдзыхты Вячеслав. Горæты хицауадæн, Транспорт æмæ фæндаггон хæдзарады комитетæн Сергей Меняйло бабар кодта, ног трамвайтæ хынцгæйæ, куысты æндæр фæтк саразын æмæ зæронд трамвайтæм базилын. Ныхас цыд сывæллæтты сæрдыгон фæлладуадзæн рæстæгыл дæр. Ацы аз аххæсдзæн 35 минæй фылдæр сабийыл. Сæ дуæрттæ байгом кæндзысты скъолаты цур тематикон лагертæ дæр. Регионы разамонæг куыд фæнысан кодта, афтæмæй рæзгæ фæлтæр сæ фæлладуадзæн рæстæг хъуамæ æрвитой æхсызгонæй, уыимæ пайдаимæ, сæйрагдæр та — æдасæй. Дзæбæхгæнæн компанимæ бафтаудзысты культурæйы уагдæттæ, Рæзты тæлмытæ, Кванториум, центр «Вершина», æмæ канд уыдон нæ. Æмбырды архайджытæ дзырдтой фæндаггон æдасдзинадыл дæр. Фæстаг рæстæг фæндаггон-транспортон цаутæ фæфылдæр сты. Сергей Меняйло бабар кодта ацы фарстамæ уæлдай æргом аздахын. Боны фæткы — æнцонвадат цæрæнуæтты фарста. Регионы æххæстгонд цæуы федералон программæ «Уæрæсейаг бинонтæн цæрæнуат». Йæ фæлгæты фарон сарæзтой 220 фатеры, ацы азы кæронмæ ма ноджыдæр 110 фатеры сцæттæ уыдзысты. Ныхас ма цыд туризмыл. Республикæмæ улæфынмæ цы адæм цæуынц, уыдон ныртæккæ зынгæ фæфылдæр сты. Регионы разамонæг бабар кодта, цæмæй банчы картæйæ фидыны гæнæнтæ æппæт цæрæн бынæтты дæр уа. Фæнысан кодта, хъæугæ уавæртæ аразын кæй хъæуы куыд туристтæн, афтæ, æнæмæнг, Цæгат Ирыстоны цæрджытæн дæр.