Коронавирусæй рынчынтæ Цæгат Ирыстоны нæй

Нæ афæлгæст мах дæр райдайдзыстæм æппæты ахсджиагдæр хабарæй. Ныртæккæ тыхсын кæны æгас дуне. Коронавирус! Адæмы стыр тас бацыд, кæд йæ зиан, ахуыргæндтæ æмæ специалистты ныхæстæм гæсгæ, уый бæрц нæу, уæддæр. Хи бахъахъхъæныны æмæ фыдбылызæй бахизын ныртæккæ уæлдай ахсджиаг у. Бæлвырдæй бæрæг у Цæгат Ирыстоны коронавирусæй рынчынтæ кæй нæй, уый! Фæлхасгæнджытæм цæстдарды управлени снысан кодта сæрмагонд телефоны номыр. Уымæ дзурæн ис коронавирус цы бæстæты фæзынд, уырдыгæй ссæугæ адæмæн. Специалисттæ сидынц цæрджытæм, цæмæй æдасдзинады домæнтæ æххæст кæной. Къухтæ хъæуы арæхдæр æхсын, æхсæнадон бынæттæм ма цæуын æмæ витаминтæй хъæздыг хæринæгтæ хæрын. Æмæ кæд адæм хæлоф кæнынмæ фесты, уæддæр хойрæгтæй нæ республикæйы дуканитæ цух не `ййафынц. Хъуыддаг ма уымæ æрцыд æмæ Уæрæсейы президент Владимир Путин фæсидт уæрæсейæгтæм, цæмæй æнæхъуаджы дуканитæм ма бырсой. Уый хынцгæйæ, нæ уацхæсджытæ абон рацыдысты хойрæгты дуканитæм æмæ сæхæдæг федтой, цы уавæр дзы ис уый. Дзæуæджыхъæуы цæрджыты дæр æрфарстой хойраг дуканиты фаг ис æви нæ? Куысты фæтк бонæй-бонмæ кæй цыбыр кæны, уый тыххæй хъусынгæнинæгтæ парахат кæнынц дзыллон информацион фæрæзты. Коронавирусы аххосæй карантины сæхгæдтой Цæгат Ирыстоны театртæ, музейтæ æмæ чиныгдæттæ. Сæ куыст æрлæууыд, ахæм фæткæвæрд адæргъвæтин уыдзæн апрелмæ. Уынаффæ рахастой Цæгат Ирыстоны культурæйы министрады. Уым куыд фæбæрæг кодтой, афтæмæй спектаклтæ æмæ культурон мадзæлттæ аргъæвтой. Кæд сæ рахæсдзысты адæмы рæгъмæ уый бæрæг нæу. Уæдæ спортивон мадзæлттæ дæр хæстæгдæр рæстæг адæм нæ фендзысты. Уагдæтты аразынц профилактикон мадзæлттæ: барынц кусджыты буары тæвд, истæмæй куы хъæрзой, уæд сæ æрвитдзысты сæ хæдзæрттæм. Ахæм мадзæлттæ ныртæккæ æххæст кæнынц алы ран дæр. Зæгъæм, сæрмагонд дезинфекци кæнынц æхсæнадон транспорт дæр. Уый размæ шофыртæ сæхæдæг ацæуынц медицинон æркаст. Шофырæн сбарынц йæ туджы æлхъывдад æмæ температурæ. Автобусты хæцæнтæ, руль æмæ дуæрттæ ныссæрфынц сæрмагонд буаргъдтæй. Уæлдай къæрцхъусдæр сты контролон-уадзæн пунктты. Кæд арæнтæ гуыдырæй æрыхгæдтой, уæддæр бынæттон цæрджытæн фадат ис хæдзармæ раздæхын. Æрмæст уыдонмæ кæсдзæн бирæвæрсыг медицинон æркаст. Рынчындæттæ нæ республикæйы цæттæ сты æмбæлгæ медицинон æххуыс бакæнынмæ. Скъолатæн æмæ уæлдæр ахуыргæнæндæттæ сæ фылдæр карантины сæхгæдтой. Бæлвырд у, дистанцион ахуырмæ кæй рахызтысты Цæгат Ирыстоны Паддахадон университет, Хæххон-Аграрарон университет æмæ Хæххон-Металлургон институт. Дæрддзæф хуызы ахуырмæ рахызтысты Медицинон академийы дæр. Практикон ахуыртæм ма дзы цæуынц, фæлæ иумæйагæй зæгъæн ис - ахуырадон фæкт фæсаууонмæ фæткмæ рахызт. Хуссар Ирыстоны университет куы райсæм, удæ æй кæд карантины сæхгæдтой, уæддæр дистанцион ахуырмæ рахизын нæ хъавынц. Уый тыххæй фехъусын кодта ахуыргæнæндоны разамынд. Куыд зæгъынц, афтæмæй ма дзы кусдзысты кæцыдæр административон хайæдтæ. Иумæйагæй куы дзурæм, уæд Хуссар Ирыстоны дæр коронавирусы ныхмæ аразынц æппæт мадзæлттæ. Президент Бибилты Анатолийы сæмбырд кодта сæрмагонд оперативон штаб. Æмбырды снысан кодтой сæ куысты фæтк. Уынаффæ рахастой 18 мартъийæ фæстæмæ скъолатæ, рæвдауæндæттæ, астæуккаг профессионалон ахуыргæнæндæттæ, уæлæмхасæн ахуырады уагдæттæ æмæ университет карантины сæхгæнын. Уыимæ ма дзы æрдзырдтой канд коронавирусæй фæрынчын уæвыны ныхмæ нæ, фæлæ ма грипп æмæ æхснырсæджы профилактикæйыл. Ныртæккæ дзы, специалистты хъуыдымæ гæсгæ, райдыдта дыккаг къæпхæн, ома адæм та ногæй æхснырсæгæй рынчынтæ кæнын райдыдтой. Афтæ махмæ дæр - Фæлхасгæнджытæм цæстдадры цæгатирыстойнаг управлени цы мониториг сарæзта, уый равдыста эпидемиологон уавæр 20% фылдæр кæй фæци, уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv