Национ наукон чиныгдоны байгом Наталья Савадян-Пароняны нывты равдыст

«Мелодия вечера», зæгъгæ, равдыст байгом национ наукон чиныгдоны. Йæ куыстытæ дзы равæрдта Цæгат Ирыстоны сгуыхт нывгæнæг Наталья Савадян-Паронян. Се 'хсæн куыд графикæ, афтæ ирд ахорӕнтӕй фыст нывтæ дæр. Æдæппæтæй 90 алыхуызон экспонаты. Дзæуджыхъæуы рагон нывтæ федта нæ уацхæссæг дæр. Дзæуджыхъæуы уынгтæ йæ аив кæртытимæ, хæдзæртты сæртæ дурæй æмбæрзт. Советон дуджы рæстæг горæты нывтæ арæх æрымысы уæды нывкæнынады училищæйы студенткæ Наталья Савадян-Паронян. Цæгат Ирыстоны сгуыхт нывгæнæгæн байгом йæ æвдæм равдыст. Сæдæгай нывтæ – раздæры рæстæджы æвдисæнтæ. Уæд æм афтæ каст, æмæ алкæддæр афтæ уыдзæн. Наталья йæ ных хицæн объекттæм нæ саразы. Уæдæ йæ сæйраг хæс сæ историон хуыз равдисын дæр нæу. Ахсджиагдæр у Цæгат Ирыстоны сæйраг горæты фæзилæнтæ, рæссугъддзинæдтæ фæнысан кæнын. Йæ хицæндзинæдтæ иннæ горæтты 'хсæн æмæ, йæ алыварс цы хæхтæ ис, уыдон. Ууыл æй ахуыр кодта скульптор Дзбойты Михал. Уæрæсейы сгуыхт нывгæнæг хорз хъуыды кæны йæ курдиатджын ахуыргæнинаджы. Фынддæс азы сфæлдыстадон фæндагыл. Йæ равдысты бирæ рагон, фæлæ ногæй-ногмæ ивддзинæдтæ кæдæм бахæссы, ахæм куыстытæ. Дзæуджыхъæуы нывтæ афæдзы алы афоны, тæрккъæвдайы размæ, сæумæрайсом. Уæдæ уæлдай аив та вæййы изæрыгон. Сфæлыста йæ «Мелодия вечера», зæгъгæ, нывы. Наталья сфæлдыстады æппынæдзух йæхиуыл кусы. Курдиатджын нывгæнæг йæ æнкъарæнтæ æвдисы æгæронæй. Йæ рог æмæ сæрибары æууæлтимæ фыст куыстытæ йын фенæн ис Национ наукон чиныгдоны.