2024-æм азы уæлдæр ахуыргæнæндæттæм исыны фæтк аивдзæн

Уæлдæр ахуыргæнæндæттæм бацæуыны фæтк ног аз, гæнæн ис, æмæ аивдзæн. Нæ бæстæйы наукæ æмæ уæлдæр ахуырады министрад бацæттæ кодта уынаффæйы проект. Уый тыххæй хъусын кæны «Уæрæсейаг газет». Ногдзинæдтæ хъуамæ ахуырмæ бахауыны фæтк фенцондæр кæной. Зæгъæм, гæххæттытæ æмбырд кæнын нал хъæудзæн. Фаг уыдзæн электронон хуызы сæ паддзахадон информацион системæтæ кæнæ та паддзахадон лæггæдты порталы сфидар кæнын. Уæлдæр ахуыргæнæндæтты сайтты æркасты номхыгъдтæ æппынæдзух ног кæндзысты, гæххæттытæ куы бадæттай, уæдæй фæстæмæ. Ног онлайн-сервисы 'руаджы абитуриенттæ кæсдзысты сæ рейтингмæ, стæй ма сæ бон базонын уыдзæн, кæцы ахуыргæнæндонмæ сæ бон бахауын у, уый. Уæдæ университеттæн дæр сæ бон уыдзæн ахуырмæ исæн кампанимæ кæсын, ивддзинæдтæ йæм хæссын. Раздæрау абитуриентæн йæ бон курдиаттæ бадæттын у 5 уæлдæр ахуыргæнæндонмæ, алыхуызон ахуыры 5 здæхтмæ. Кæд нырмæ бюджетон бынатмæ чи цыд, уыдонæн равзарæн уыд университеты мидæг æй тынгдæр цы факультетмæ фæнды, уæд ма ныр та равзарæн уыдзæн фылдæр æй цы уæлдæр ахуыргæнæндонмæ бахауын фæнды, уый дæр.