Ныр дзы пайда кæндзысты

Мæскуыйы сарæзтой посты маркæйы нысанæвæрды кадджын мадзал. Рауагътой йæ Орджоникидзейы уæлдæр иумæйагæфсæддон училищæйы 100 азы юбилейы бонмæ. Нысанæвæрды мадзалы фæстæ фыццаг маркæ баныхасынц фыстæгыл æмæ йыл сæвæрынц мыхуыр. Зилдухмæ рацыд аивадон хуызы нывæфтыд маркæ, йæ тираж – 176 мин экземпляры. Йæ уæлæ йын бакодтой, цы училищæйы номыл уагъд у, уый бæстыхайы ныв æмæ йæ тырыса. Бастдзинады федералон агентады разамонæг Олег ДуховнИцкий куыд зæгъы, афтæмæй ацы цау суыдзæн, æмбал кæмæн нæй, ахæм лæвар училищæйы ахуырдзаутæ æмæ ахуыргæнджытæн. Уæвгæ, алыхуызон паддзахадон æмæ æхсæнадон цаутимæ баст, кæнæ та юбилейæн бонтæм ахæсгæ филателистикон продукци нæ бæстæйы арæх фæзыны. Ацы хатт кадджын мадзалмæ фæдзырдтой Уæрæсейы Президенты цур нæ республикæйы æххæстбарджын минæвары хæдивæг Борис Реямæ дæр. Уый Цæгат Ирыстоны хицауады номæй арфæ ракодта, бæрæгбонмæ чи сæмбæлд, уыдонæн, стæй йæ саразджытæн. Куыд бафиппайдта, афтæмæй дзæуджыхъæуккаг училищæ йæ азфысты `мгъуыдмæ æхсæнадæн бацæттæ кодта мингай офицертæ, 300 инæларæй фылдæр, Советон Цæдис æмæ Уæрæсейы хъæбатыртæ та баисты 81. Бафтаудзыстæм ма уый, æмæ йæ юбилейыл училищæ сæмбæлд цалдæр боны размæ. Ныр ын йæ ном æрхъуыды кодтой федералон æмвæзадыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv