Алагиры дондзæуæн хæтæлтæ ивынц национ проект «Экология»-мæ гæсгæ

Алагиры районы дондзæуæн хæтæлтæ ивынц национ проект «Экология»-йы хицæн проект «Чистая вода»-йы фæлгæты. Районы дондзæуæн хæтæлтæ æппындæр нал бæззынц. Цæгат Ирыстоны цæрæнуæтты-коммуналон хæдзарад, артаг æмæ энергетикæйы министр Тамайты Майраны ныхæстæм гæсгæ, федералон бюджетæй проект æххæст кæнынмæ рахай кодтой 300 милуан сомы. Уыдонæй рацараздзысты дондзæуæн хæтæлтæ поселок Редант æмæ Алагиры районы. Уым нуазæн дон кæлы æрмæст дæр цæрджытæй 23%-мæ. Республикон бюджетæй та уыцы куыстытæн рахай кæндзысты 3 милуан сомы. Министр ма куыд фæбæрæг кодта, афтæмæй уыцы фæрæзтæ æгас республикæйы дондзæуæн хæтæлтæ баивынæн фаг нæ уыдзысты. Финансированийы 70% схардз кæндзысты дон сыгъдæг кæныны куыстытыл, 30% та - хæтæлтæ баивынæн. Тамайты Майран ма куыд загъта, афтæмæй республикæйы ис бирæ цъитиджын дæттæ æмæ суадæттæ. Уыдон уæлдай тынг сыгъдæг кæнинаг дæр нæ вæййынц. Фæлæ доны хæтæлтæ та сты ивинаг. Уыдонæй бирæтæ арæзт æрцыдысты 1940-æм - 1950-æм азты. Уымæ гæсгæ министрады рахастой ахæм хъæппæрис, цæмæй фæрæзтæн сæ фылдæр хæтæлтæ ивыныл хардзгонд æрцæуа, дон сыгъдæг кæныны бæсты. Зæгъын хъæуы уый, æмæ республикæйы дондзæуæн æппæт объекттæн дæр скодтой инвентаризаци. Хатдзæгтæм гæсгæ хæрзхъæд нуазыны дон кæлы республикæйы 86% цæрджытæй чысыл фылдæрмæ. Национ проекты руаджы та уыцы бæрæггæнæн 2024-æм азмæ хъуамæ суа 90%-æй фылдæр. Ууыл схардз кæнын хъæуы 10 миллиард сомæй фылдæр. Профилон министрады куыд зæгъынц, афтæмæй æнхъæлмæ кæсынц регионтæн уыцы программæмæ гæсгæ фылдæр фæрæзтæ кæй раттдзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv