Майданты тыллæг

Райсом Кæсæг-Балхъары уыдзысты Цæгат Кавказы федералон зылды гом ерыстæ тхэквондойæ. Чемпионаты сæ арæхстдзинад равдисдзысты Цæгат Ирыстойнаг спортсментæ дæр. Мæздæджы тхэквондойы скъолайы хъомылгæнинæгтæ дæр чемпионатмæ сæхи æнтыстджынæй бацæттæ кодтой. Къуыри иу сæм 6 хатты уыд тренировкæтæ. Цæмæй цымыдисаг ма у ацы спортивон скъола, уый базыдта не `сфæлдыстадон къорд. Раст куыд æрлæууын хъæуы, ныхмæлæууæджы тыхджындæр æмæ лæмæгъдæр миниуджытæ куыд рабæрæг кæнæн ис. Æрыгон спортсментæ сæ тренеры алы ныхасмæ дæр лæмбынæгæй хъусынц. Уый дæр архайы, ацы спорты хуызы æппæт сусæгдзинæдтæ дæр йæ хъомылгæнинæгтæм фæхæццæ кæныныл. Æппæты вазыгджындæр дзы у рæвдз хъуыды кæнын æмæ тагъд сарæхсын. Тхэквондойы скъола "Али", зæгъгæ - афтæ хонынц æрыгон спортсментæ сæ спортивон секци. Нæ республикæйы ацы скъолайæн æмбал нæй. Уымæн æмæ дзы фæсивæд тхеквандойы дыууæ хуызæй хæцынц. Тренеры ныхæстæм гæсгæ, уыдон, цыма, спорты дыууæ алыхуызон хуызыл банымайæн ис. Фæлæ кæд æнцон спорт нæу, уæддæр фæсивæд æвдисынц хорз бæрæггæнæнтæ. Хæрз æрæджы 22 спортсм ны ацыдысты Пятигорскмæ. Ерыстæм æмæ æрбаластой 20 майданы. Иу балл сын не сфаг, цæмæй командæты хсæн фыццаг бынат райстаиккой. Хæрзиуджыты хсæн ис 6 сыгъзæрин, 8 æвзист æмæ 6 бронзæ майданы. Уæлахиздзауты хсæн ис чызджытæ дæр. Сывæллæтты ныхæстæм гæсгæ, сын тых дæтты, иумæ кæй архайынц, уый. сæ кæрæдзийæн ныфсытæ авæрынц ерысты рæстæг, стæй æххуыс кæнынц кæрæдзийæн тренировкæты рæстæг дæр. Æрыгон спортсментæ сæ тренировкæты бафæстиат вæййынц цалдæргай сахаты къуырийы 6 боны. Спарингты уæлдай ма æнæмæнг цалдæр километры кросстæ дæр фæтæхынц. Ныртæккæ æрыгон спортсментæ сæхи цæттæ кæнынц иннæ ерыстæм дæр. 19-æм январы Налцыккы арæзт æрцæудзысты Цæгат Кавказы федералон зылды гом ерыстæ тхэквандойæ. Чемпионаты хатдзæгтæм гæсгæ спортсменты хсæн равзардзысты Уæрæсейы ерыстæм кæй арвитдзысты, уыдоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv