Сочийы абон ахицæн экономикон форум

Инвестицион форумы дыккаг бон дæр уыд хъæздыг цаутæй. Райдыдта премьер Дмитрий Медведевы фембæлдæй регионты сæргълæуджытимæ. Уый уыд боны сæйрагдæр мадзал. Ныхас цыд, регионалон бюджеттæ æнæцудгæ æмæ хъæддых скæныны тыххæй. Дмитрий Медведев бафиппайдта, федералон хицауад кæй архайы субъекттæ сæ экономикон гæнæнтæ рæзын кæнынмæ разæнгард кæнын. Премьеры ныхæстæм гæсгæ, уыцы куыстæн ныридæгæн ис хорз хатдзæгтæ. Кæд Уæрæсейы регионтæн хæстæ ис, уæддæр ацы фарста æнтыстджынæй лыг кæныныл архайынц. Фæстаг æртæ азмæ регионтæн лæвæрд æрцыд кредит триллион сомы бæрц. Цæгат Ирыстон йæ фадæттæй пайда кæны. Форуммæ ацы аз æрбаластой 9 проекты. Уыдоны тыххæй нæ республикæйы экономикон рæзты министр Томайты Хъазыбег радзырдта презентацийы рæстæг. Се 'хсæн куыстуат «Миранда»-йы æмбал кæмæн нæй, ахæм проект. У æрдзон консервант – сорбины туагад уадзыны тыххæй. Арæх дзы фæпайда кæнынц, регионы та йæ ничи цæттæ кæны. Æндæр хорз фадат ма инвестортæн – логистикон центры саразыны хъуыды. Форумы сæйрагдæр хæс уыд инвестортæн регионты тыхджындæр миниуджытæ равдисын æмæ цын хуыздæр куысты уавæртæ сæ размæ рахæссын. Æппæт Цæгат Кавказы республикæтæн дæр форум разынд тынг бæркадджын. Нæ республикæ бафыста цалдæр бадзырды. Се 'хсæн – паддзахадон æмæ хи куыстуæтты æмгуыстады рæзты национ центримæ; ассоциаци «Национальное конгресс бюро»-имæ. Уый стыр пайда хæсдзæн туризмы рæзтæн. Сæрмагонд инвестицион проектты уæлдай ма республикæтæ кæрæдзийымæ дæр æмгуыстады бадзырдтæ бафыстой. Зæгъæм, Стъараполы край базарадон, экономикон, наукон-техникон, социалон æмæ культурон æмгуыстады тыххæй бадзырд бафыста Псковы область æмæ Карелийымæ. Кæсæг-Балхъар дæр фæстейы нæ баззад. Бафыста бадзырдтæ æртæ регионимæ: Чувашийы æмæ Карелийы республикæтæ æмæ Тулæйы облæстимæ. Иу дзырдæй, дыууæ бонмæ Сочи сси Уæрæсейы сæйраг горæт. Дарддæр та куыст цæудзæн регионты. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv