Цæгатирыстойнаг дзюдоисттæ архайдтой Уæрæсейы чемпионаты дзюдойæ

1 сыгъзæрин, 1 æвзист æмæ дыууæ бронзæ майданы. Ахæм у цæгатирыстойнаг богæлтты хæрзиуджыты голлаг. Тюмены ацыдысты Уæрæсейы ерыстæ дзюдойæ. Хæцыдысты 23 азы кæуыл нæма сæххæст уыдон. Æдæппæтæй 500 спортсменæй фылдæр. Бронзæ майдантæ райстой Гæджиты Алинæ æмæ Æлборты Аланæ. Æвзист майданы хицау та сси Хъайсынты Мæдинæ. 73 кг онг уæзы сыгъзæрин майдан райста Гæмосты Давид. Кæронбæттæн тохы фæуæлахиз Цæцæны республикæйы минæвар Ахмед Дугушевыл. Йæ ныхæстæм гæсгæ йæ ныхмæллæуджытæ уыдысты тыхджын æмæ фæлтæрдджын. Нæ спортсменты ерыстæм бацæттæ кодтой тренертæ Джиоты Герас, Гæбæраты Автандил, Хуыгаты Витали, Беккуызарты Алик æмæ Цæгæраты Хъазыбег. Чемпионаты сæ арæхстдзинад равдыстой дзюдоисттæ æгас Уæрæсейæ. Уæлахиздзауты æмæ призертæм ныр æнхъæлмæ кæсынц уæлдæр къæпхæны ерыстæ æмæ Гран-притæ. Дарддæр йæхи æвзыгъддæр чи равдиса, уыдонæн уыдзæн Дунеон чемпионаты архайыны бар. Ныр цæгатирыстойнаг спортсментæ сæхи цæттæ кæндзысты Европæйы Кубокмæ. Æвзарæн къæпхæн ацæудзæн майы, Оренбургы. Уæрæсейы чемпионаты уæлахиздзау дзюдойæ Гæмосты Давид: «Хæцыдтæн æхсæз схваткæйы, фыццаг æртæ уыдысты зын. Фыццаг бон афтæ вæййы, уымæн æмæ цалынмæ дæхи схъарм кæнай æмæ дæ тыхтæ банкъарай уымæн фæхъæуы рæстæг. Финалмæ хæстæгдæр мын уыд æнцондæр, мæхимæ æрцыдтæн, мæ улæфт дæр ахæм зын нал уыд. Æппæты фылдæр тыхтæ бахардз кодтон æрдæгфиналмæ рацæуыны бар райсыны схваткæйы. Фыццæгты хæрд кодтон, фæлæ йыл кæронбæттæны уæддæр фæуæлахиз дæн». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv