Раппæлинаг хъуыддæгтæй æххæст сты нæ республикæйы кафджыты къорд «Дети Гор», зæгъгæ

Фæлладуадзæн бонтæ кæронмæ фæхæццæ кæнынц. Уæлдай æнкъард та сыл кæнынц скъоладзаутæ. Тагъд сывæллæттæ кæрæдзийæн дзурдзысты, чи кæм баулæфыд æмæ йæ рæстæг куыд арвыста. Раппæлинаг хъуыддæгтæй æххæст сты нæ республикæйы кафджыты къорд «Дети Гор», зæгъгæ. 30 адæймагæй абалц кодтой Сабыр фурдмæ, бæлвырддæр та Тайваньмæ. Уым сарæзтой фестиваль, проект «Союз культур»-ы фæлгæты. Архайдтой дзы 24 бæстæйы минæвары. Ансамбаль «Дети Гор» уыд иунæг минæвар Уæрæсейæ. Чызджыты рог уæнгты змæлд æмæ цæхæрцæст лæппуты къахфындзтыл кафт - репетицитæ сæ тæмæны сты. Сæрдыгон фæлладуадзæн бонтæ фæстейы аззадысты. Ацы къордæн уæлдай цымыдисаг рауад сæ балц. Æрыгон кафджытæ сæ фæндаг акодтой фæсарæнтæм - архайдтой Тайваны цы егъау аивадон фестиваль ацыд, уым. Ансамблы разамонæг Козаты Станислав куыд зæгъы, афтæмæй бацæттæ кодтой алыхуызон кæфтытæ. Чызджытæ æмæ лæппутæ сæхи арæхстджынæй равдыстой. Дæсгай номыртæ, уазджыты къухæмдзæгъд æмæ зæрдæйæ хъæлдзæг ахастдзинад. Афтæ бахъуыды кодтой къорды архайджытæ сæ балц. Кафынмæ куыд сæрæн уыдысты, афтæ æндæр мадзæлтты бацархайынмæ дæр. Сывæллæттæн сарæзтой цымыдисаг экскурситæ. Федтой æмæ базыдтой горæт цæмæй хъæздыг, уый. Фестивалы фæлгæты ма архайджытæн скодтой дæсныйад æвдисæн ахуыртæ. Фестивалы архайдтой 24 бæстæйы минæвæрттæ. Чехи, Словаки, Турк, Чили æмæ æндæртæ. Уæрæсейы минæвар - Ансамбаль «Дети Гор» - иунæг. Бахъахъхъæдтой нæ бæстæйы ном. Афтæ æнтыстджынæй сæхи æвдисынц дунейы æндæр бæстæты дæр. Ныридæгæн сын сæ курдиатæн аргъ чи скодта, ахæмтæ бирæ ис. Тайваны аивадон фестивалы кæронбæттæн къордæн саккаг кодтой статуэткæ æмæ зæрдылдарæн лæвæрттæ. Козаты Станиславы ныхæстæм гæсгæ, сывæлæттæ ахæм зæрдæрухсæй кæй баззайдзысты, уый æнхъæл нæ уыд. Дарддæр сæм æнхъæлмæ кæсынц репетицимæ, радон концерттæ æмæ алыхуызон аивадон мадзæлттæ. Пелиты Сабинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv