Æрыдоны сывæллæтты сфæлдыстады хæдзары фæзынд инженерон къордтæ

Уæрæсейы уæлæмхасæн ахуырады рæзтыл куыст цæуы национ проект «Образование» æмæ федералон проект «Успех каждого ребенка»-йы руаджы. Инженерон къордтæ кусын райдыдтой Æрыдоны сывæллæтты сфæлдыстады хæдзары дæр. Нырыккон кусæнгæрзты руаджы сабитæн æргом кæнынц робототехникæйы сусæгдзинæдтæ дæр. Тыджыты Русланы стырдæр бæллиц у инженер суæвын. Уæгъд рæстæг ын куыддæр вæййы, афтæ æмбырд кæны алыхуызон конструктортæ. Алы лыстæг хай дæр йæ бынаты æнцонтæй сæвæры. Ныртæккæ Руслан ахуыр кæны роботтæ æмбырд кæныныл. Компьютеры программæйы руаджы робот сызмæлын кæны. Ноутбуктæ, сæрмагонд комлекттæ æппæт хъæугæ лыстæг хæйттимæ. Алы комплекты дæр ис микрокомпьютер. Сывæллæттæн дзы æппæт нырыккон кусæнгæрзтæ дæр ис. Къорды архайынц 7 азæй фылдæр кæуыл цæуы, уыцы сабитæ. Фыццаг робот сæмбырд кæнын ныридæгæн сæ къухы бафтыд. Программæ гæсгæ афæдзы дæргъы сæмбырд кæндзысты 12 алыхуызон роботы. Лада Сушилина, Æрыдоны сывæллæтты сфæлдыстады хæдзары кусæг: «Нæ ахуырты рæстæг сабиты базонгæ кæнæм робототехникæйы сусæгдзинæдтимæ. Фыццаг уал райдыдтам «танцующие птицы», зæгъгæ, роботæй. Æнцон æмбырд кæнæн уыди. Сабитæ йыл зæрдиагæй бакуыстой. Ног кусæнгæрзты руаджы сывæллæттæ къæйттæй суанг райдианæй сæмбырд кæнынц роботтæ æмæ сæ уый фæстæ компьютеры руаджы æркусын кæнынц». Ам та архайынц кæстæр къорды сабитæ. Æмбырд кæнынц Лего конструктортæ. Уый руаджы хъуыды дæр хуыздæр кæнын райдайынц, стæй сæ уырзты æнкъарынадыл дæр бакусынц. Уыимæ ма, сабитæн сæ зæрдæйы ахаст дæр фæхъæлдзæгдæр вæййы. Хæстæгдæр рæстæг ма Æрыдоны сывæллæтты сфæлдыстады хæдзары кусын райдадзæн мультимедион технологиты къорд дæр. Сывæллæтты дзы ахуыр кæндзысты клиптæ æмæ мультипликацион нывтæ кæныныл. Стæй ма, аудио æмæ видеоредакторимæ кусын дæр базондзысты. Елена Тащилина, Æрыдоны сывæллæтты сфæлдыстады хæдзары педорганизатор: «Ныртæккæ ногæй цы къордтæ кусын райдыдтой, уым сывæллæттæ зæрдæргъæвдæй архайынц. Сæ зонындзинæдтæ æмæ арæхстдзинад уæлдæр кæнынц. Се сфæлдыстадон курдиаттæ раргом кæнынæн дæр стыр æххуыс сты ацы къордтæ. Сабитæ ахуыр кæнынц командæйы кусыныл. Сæ зæрдæмæ кæй цæуы, уый та нæ куыстæн у стырдæр аргъ». Нырыккон кусæнгæрзтæ ам фæзындысты национ проект «Образование» æмæ «Успех каждого ребенка», зæгъæг, федералон проекты фæлгæты. Ныр уал сабитæ æмбырд кæнынц конструктортæ æмæ роботтæ, аразынц схемæтæ. Ам цы зонындзинæдтæ райсой, уыдон сæ фидæны дæсныйад равзарынмæ стыр æххуыс фæуыдзысты. Бирæтæ дзы, æнæмæнг, равзардзысты инженеры дæсныйад. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv