Æнтыстджын къахдзæфтæ

Цæвиттон, чи кæсаг ахсыныл тыхсы, чи та - ног зонындзинæдтыл цуан кæны. Сывæллæттæй зæгъæм. Сæ пайдайæн Цӕгат Ирыстоны сфидар кодтой полилингвалон ахуырадон программӕ. Райдыдтой рæвдауæндæттæй. Сывӕллӕттӕ ӕнӕхъӕн бон иронау куы дзурой, уæд сæхи `взагыл тагъддӕр фæцалх уыдзысты. Уыцы фæрæз знон, мыййаг, не `рхъуыды кодтой, йæ хъомысыл ахуыргæндтæ рагæй дзурынц. Специалистты ныхæстæм гæсгæ, полилингвалон ахуырад сывæллæттæн æрмæст сæ зонындзинæдтæ нæ фылдæр кæны, фæлæ ма сын сæ миддуне дæр хъæздыгдæр кæны. Цавӕр ӕнтыстдзинӕдтӕ уал бафтыд сæ къухы полилингвалон системæйы кусджытæн æмæ иннæтæй цæмæй хицæн кæнынц? Абон Брытъиаты Феликс йæхи кусынæй амардта, уымæн æмæ та ацы æрмæг дæр уый бар бакодтам. Ацы сабитæ сты Хъæдгæроны сывæллæтты рæвдауæндоны кæстæр къорды хъомылгæнинæгтæ. Ам ныр афæдзы рдæг сывæллæттæ ахуыр кæнынц полилингвалон системæмæ гæсгæ. Æмдзæвгæтæ кæсын æмæ аргъæуттæ дзурын сабитæн нырма зынтæй уайы, фæлæ тынг архайынц. Уый та у сæйрагдæр- зæгъы Есиаты Ритæ. Хъомылгæнæджы хъуыдымæ гæсгæ, саби хъуамæ ирон æвзаг хъуса арæхдæр. Диссаг у, фæлæ хъæуты дæр ацы хъуыддаг ахсджиаг у. Кæстæр къорды сабитæ кæд нырма рæвдауæндонмæ хæрз чысыл рæстæг цæуынц, уæддæр бæрæг у сæрмагонд ахуырады хъомыс. Полилингвалон системæ кусын райдыдта Цæгат Ирыстоны паддзахадон университеты «ЮНЕСКО»-йы кафедрæйы специалистты хъæппæрисæй, стæй нæ республикæйы ахуырад æмæ наукæйы министрады бардзырдмæ гæсгæ. Ацы куысты сын æххуыс у, сæрмагондæй «ЮНЕСКО»-йы кафедрæйы цы æрмæг бацæттæ кодтой, уый. Полилингвалон системæ райдыдтой къорд азы размæ фæлварын. 2018 азæй фæстæмæ та йæ æххæст кæнынц закъонмæ гæсгæ. Уыимæ канд Дзæуджыхъæуы нæ, фæлæ ма хъæуты дæр. Ирон традицитæ æмæ æгъдæуттæн мадæлон æвзаг сæ бындур кæй у, уый дызæрдыггаг нæу. Æвзаг сæфынæй бахизынæнæн Хъæдгæроны скъолайы дæр фæлварынц полилингвалон ахуырад. Зæгъын хъæуы, æнтыстджынæй. Национ æвзагæн сафæн нæй. Уæд историйы арфы аныгъуылдзысты культурон традицитæ. Ног фæлтæртæ сæ национ культурæйы хæзнатæн зондзысты æрмæст сæ чысыл хай, иннæтæ та сын уыдзысты дуарæхгæд, иронау кæй нæ зонынц, уый аххосæй. Æвзаг æмæ культурæ сты адæмы æнгомгæнæг хæзна. Уый скъоладзаутæн ам æмбарын кæнынц фыццæгæм къласæй. Сывæллæттæ архайынц зæрдæргъæвдæй. Полилингвалон ахуырады бындуры æвæрд ис цапдæр æвзаджы зонын, ома, предметты иу хай лæвæрд цæуы иронау, дыккаг хай - уырыссагау, æртыккаг - фæсарæйнагыл. Полилингвалон бындур æххæстгонд у æмбæлгæ мидисæй. Математикæйæ, алфамблай æмæ дуне зонынæй, музыкæйæ, нывкæнынадæй цы ног чингуытæ бацæттæ кодтой ЮНЕСКÆЙЫ кафедрæйы, уыдоны мидисы аивæй иу кæнынц, куыд æппæтадæмон æмæ уæрæсейаг культурæты сæрмагонд зонындзинæдтæ, афтæ ирон историон æмæ культурон цаутæ дæр. Сæрмагонд методикæ сывæллæтты хъомыладыл хорзырдæм кæй зыны, уый бæлвырд у. Уæдæ хъомылгæнджыты дæсныдзинад дæр гуырысхойаг нæу. Бæргæ хорз уаид, сабитæ сæ мадæлон æвзагмæ æрмæст рæвдауæндоны нæ, фæлæ ма хæдзары дæр куы æмхиц кæниккой, уæд. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv