Хетæгкаты Къостайы хæдзар-музейы Нары цæуынц бындурон рацарæзтытæ

Аланийыл Дзуæрттæфтыды 1100 азы бон бæрæг кæныны мадзæлттæм ныридæгæн цæттæ кæнынц республикæйы. Уый фæлгæты бындурон рацарæзтытæ цæуынц культурон объектты. Уыдонæй иу — Хетæгкаты Къостайы хæдзар-музей Нары. Цы специалисттæ йыл архайынц, уыдоны ныхæстæм гæсгæ, тынг лæмбынæг куыст бакæнын хъæуы. Уыимæ æппæт аиуварсгæнинаг фарстатыл дæр бæстонæй бакусын. Йӕ фӕлгонц сси бӕрзонддзинад ӕмӕ уӕздандзинады нысан, ӕнӕхъӕн адӕмæн фӕндагамонӕг стъалы. Ацы ныхæсты Абайты Васо ирдæй равдыста, Хетæгкаты Къоста алы иронӕн дӕр ӕнӕкӕрон зынаргъ кæй у. Къостайыл хъуыдыгӕнгӕйӕ, нӕ ӕрфӕнды хуыздӕр, сыгъдӕгдӕр, зондджындӕр уӕвын. Ирон литературӕйы бындурӕвӕрӕг, ирон литературон ӕвзаг саразӕгæн йе 'рттиваг курдиат сæвзæрд Нары хъæуы. Зæронд мæсгуыты хæлддзæгты цур ис хæдзар. Ам райгуырдис æмæ йæ сывæллоны бонтæ арвыста Къоста, ам федта мæгуыр хæххон адæмы цард. Поэты райгуырды 80 азы бонмæ, 1939 азы, йæ хæдзары бынаты арæзт æрцыд музей. 1979-æм азы ам сарæзтой цыппаруæладзыгон бæстыхай. Йæ фæлгонц ын скодтой раздæры мæсгуыты хуызæн. Хæдзары рацарæзты автор у Бтемыраты Анатолий. Дурæй амад къултæ сты рагонты хуызæн æмæ сфидауын кодтой рæсугъд хæххон нывтæ. Уыцы рæстæг ма сног кодтой музейы экспозици. Ног дзауматæ ирдæй равдыстой Къостайы цард æмæ сфæлдыстад куыд поэт, нывгæнæг æмæ æхсæнадон архайæг, афтæ. Уыдис ма дзы скъæт æмæ хæдзар. Уыдон та уыдысты уыцы рæстæджы хохаг царды æвдисæнтæ. Мемориалон комплексы рацарæзтмæ Нары рагæй æнхъæлмæ кастысты. Цалцæггæнæн куыстытæ-иу снысан кодтой юбилейон бонтæм. Ныр дзы рацарæзты куыстытæ кæнынц Аланийыл Дзуæрттæфтыды 1100 азы бонмæ. Компани «Скифос-РСК»-йы специалисттæ бакуыстой сæрмагонд проектыл. Уыд ын паддзахадон историон-культурон экспертизæ. Хорзыл æй банымадтой культурон хæзнатæ хъахъхъæныны æмæ сæ пайда кæныны комитеты дæр. Æнæмæнг, специалистты сæйраг хæс у объекты фыццаг фæлгонц бахъахъхъæнын. Фæлæ дзы, уыцы иу рæстæг, хъæуы нырыккон уавæртæ саразын дæр. Ныр бæстыхайы фæзындзæн хъармгæнæн системæ. Уæдæ фæфылдæр кодтой электрон тыхы хъомыс дæр. Æппæт коммуникацитæ цæуынц зæххы бын. Ныртæккæ специалисттæ архайынц пъолтæ æмæ къултæ схорз кæныныл. Уый фæстæ сног кæндзысты паркет дæр. Кусытытæ сæ тæмæны уыдысты, афтæмæй специалистты размæ сæвзæрд аиуварсгæнинаг фарстатæ дæр. Ацы аз Нары мемориалон хæдзар-музейы Къостайы гуырæн бонимæ баст мадзæлттæ се 'ппæт саразын, хъыгагæн, нæ бантысдзæн рацарæзты тыххæй. Бæрæгбон арæзт æрцæудзæн Дзæуджыхъæуы, Бутырины номыл уынджы хæдзар-музейы. Ам Къоста æрцард 1901-æм азы, Херсонæй куы æрыздæхт, уæд. Куыд æрвылаз, афтæ та ныр дæр, 15 октябры Дзæуджыхъæуы, поэты цырттдзæвæны цур мадзалы архайджытæ сæвæрдзысты дидинджытæ. Æппæт скъолаты, уæлдæр ахуыргæнæндæтты арæзт æрцæудзæн мысæн изæртæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv