Рæстдзинад - нæ хæзна

95 азы "Рæстдзинадыл" кæй рацыд, уый йын стыр бæрæгбон у. Æнусон юбилеймæ ма баззад 5 азы. Газетты фыццаг номыр рухс федта 1923 азы. Йæ фыццаг редактортæ уыдысты Ирыстоны зындгонд фысджытæ æмæ æхсæнадон архайджытæ. Се хсæн - Гæдиаты Цомахъ, Барахъты Гино, Къосираты Сæрмæт. Æртын азæй фылдæр газеты разамонæг уыд Хъаныхъуаты Владимир. Ныртæккæ уыцы хæстæ бæрнонæй æххæст кæны Битарты Маринæ. Рауагъды тираж 7 мин экземплярмæ хæстæг у. Газет цæуы къуыри 5 хатты. Зæгъæн ис, æмæ «Рæстдзинад» ирон æвзагыл цæуæг дзыллон информацион фæрæзтæ сæ уарзондæр кæй у. Цæрджытæн - раст хи бинойнагау. Кæсынц æй алы кары адæм. Технологон дуджы тагъд цыд дæр уæлдай тынг нæ ахады газеты сыфты фезмæлдыл. Уымæн æмæ алы ирон хæдзары дæр ахуыр сты рæстдзинадыл. 95 азы «Рæстдзинад» йæ кæсджытыл у æнувыд. Ис ын йæхи æвзаг: æргомæй дзы фыссынц æхсæнадон-политикон уавæрыл. Йæ сыфтыл фенæн ис æнæниздзинад хъахъхъæнын, ахуырад, наукæ, культурæ æмæ æндæр ахсджиаг фарстатыл æрмæджытæ. Кæд фæлтæрдджын æмæ азтæм гæсгæ ацæргæ у, уæддæр цух нæу нырыккон ифтонгадæй. Æмæ дзы хъомысджынæй пайда кæнынц. Ирыстоны цард æмæ вазыгджын хабæрттæ базонæн ис газеты сайты. Республикæйы арæнтæй чи фæиппæрд, уыдонæн дæр фадат ис газет кæсынæн интернеты тыгъдады. Уый Рæстдзинады сфæлдыстадон къордæн уæлдай тых дæтты. Хетæгкаты Къостайы номыл паддзахадон премийы лауреат уалдзыгон хуры комулæфтау алы ирон хæдзармæ дæр хæссы фарны хабæрттæ. Рæстдзинад у нæ адæмы иугæнæг æмæ ирон дзыллæйы иумæйаг ныхас. Ирыстоны цæрджытæн дзы бар ис сæ хъуыдытæ, сæ фиппаинæгтæ æргомæй бæлвырдæй зæгъынæн. Рæстдзинадæн ис йæхи фæндаг, рæстæгимæ дæр кæны æмдзу. Газет бахъахъхъæдта, ирон адæмæн йæ удæй зынаргъдæр чи у, уыцы хæзна - мадæлон æвзаг. Нæ телекомпанийы номæй арфæ кæнæм Рæстдзинады кусджытæн æмæ сын нæ зæрдæ зæгъы сæ кæсджыты нымæц фылдæр куыд кæна. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv