Пенсион фонд нымæцон хуызмæ ивын райдыдта фæллойадон чингуытæ

Январы райдианæй йæ тыхы бацыд ног закъон - Уæрæсейы Пенсион фонд нымæцон хуызмæ ивын райдыдта нæ бæстæйы цæрджыты фæллойадон чингуытæ. Закъоны проект Уæрæсейы Паддзахадон Думæмæ ивгъуыд аз бахаста фæллой æмæ социалон хъахъхъæнынады министрад. 2021-æм азæй фæстæмæ та гæххæттын чингуытæ уæвгæ дæр нал уаддзысты. Баивдзысты сæ электрон хуызы чингутыл. Уыимæ куыстдæттæг организацитæн дæр хъæудзæн Пенсион фондмæ бæрæггæнæнтæ электрон хуызы хæссын. Гæххæтытимæ дарддæр кæй фæнда кусын, уыдон 2020-æм азы кæронмæ хъуамæ ныффысой курдиат. Бадæттын æй хъæудзæн, кусгæ кæм кæныс, уыцы организацимæ. Специалисттæ сидынц алкæмæ дæр, цæмæй фидæны спайда кæной ногдзинадæй. Уый дзæвгар фенцондæр кæндзæн куыст. Фæллой кæныны æвдисæндарæн фесæфынæй тас нал уыдзæн - бахæсдзысты йæ электрон базæмæ. Куыстдæттæг компанитæн та сæ бон уыдзæн æппæт бæрæггæнæнтæ пенсион фондмæ æмæ электрон системæмæ дæр хæссын. Ног ивддзинæдтæ фæрогдæр кæндзысты куыстуæтты разамонджытæн сæ куыст. Ома, гæххæтытимæ архайын сæ нал хъæудзæн. Уæдæ пенсион фонды куыстыл дæр хорзы `рдæм фæбæрæг уыдзæн. Кусæджы йæ гæххæтытæ агурын нал хъæудзæн. Æппæт информаци дæр нысангонд цæудзæн электрон хуызы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv