Центр «Заря» йы ацыд патриотон зарджыты конкурс

«Цæмæй райдайы райгуырæн бæстæ?» - ахæм сæргондимæ центр «Заря»-йы ацыд патриотон зарджыты конкурс. Арæзт æрцыд Фыдыбæстæйы Стыр хæсты 75 азы юбилеймæ, цæмæй хæстон зарджытæ æрымысой, уый тыххæй. Республикон конкурс адих кодтой дыууæ номинацийыл: «Солист» æмæ «Вокальный ансамбль», зæгъгæ. Архайдтой дзы республикæйы æппæт горæттæ æмæ районты минæвæрттæ, 6 азæй - 17 азы онг кæуыл цæуы, ахæм сывæллæттæ. Конкурсантты дæсныдзинадæн аргъ кодтой жюрийы уæнгтæ: Гергиты Валерийы номыл Аивæдты колледжы, вокалон хайады сæргълæууæг Чочиты Тамарæ, Цæгат Ирыстоны культурæйы сгуыхт кусæг Мамыхъуаты Людмилæ æмæ Сывæллæтты сфæлдыстады галуаны директоры хæдивæг Тотиты Кларæ. Конкурсы сæйраг нысан уыд сывæллæтты сæ адæмы музыкалон бынтимæ зонгæ кæнын, сæ зæрдæты уарзондзинады тæгтæ æвзæрын кæнын, райгуырæн бæстæ уарзын, сæ адæмы культурæ æмæ истори зонын, стæй патриотон хъомыладмæ архайджыты разæнгард кæнын. Ууыл сæ ахуыр кæнынц сæ разамонджытæ дæр. Патриотон хъомылад стыр бынат ахсы ныры царды. Фыдыбæстæйы Стыр хæсты зарджытимæ сывæллæттæ зонгæ кæнынц цымыдисагæй. Кæмæндæр ацы конкурсы фыццаг къахдзæфтæ сты, æмæ фыццаг хатт зары хæстон зарджытæ. Чидæр та ахæм æркастытæм фенхъæлмæ кæсы æрвылаз. Жанна Абагова, республикон сывæллæтты сфæлдыстады галуаны методист: «Зарæгимæ тох кодтой, зарæгимæ танкты бын хаудысты, зарæгимæ сæ фæллад дæр уагътой, салдаты зæрдæ тохы зарæгæй хъарм кодта. Зарæджы кой куы кæнæм, уæд зарæг у, удæй цы æнкъарæм, уый. Алцыдæр зарæгæй у. Æнкъард æмæ хъæлдзæг хабæрттæ дæр баст сты зарæгимæ». Хуытъиаты Тамарæ, архайæг: «Хæстон зарджытæ махæн сты нæ царды хай. Уыцы хæстон зарджытæ салдæтты сгуыхтдзинæдтæм разæнгард кодтой, салдæттæ рæнхъыстады лæугæйæ, зарыдысты хæстон зарджытæ. Мæнмæ гæсгæ, мах дæр сæ хъуамæ хъуыды кæнæм æмæ ма рох кæнæм хæстон зарджытæ». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv