Александр Суворовы номыл Цæгат Кавказы æфсæддон училищæйы сарæзтой гом дуæртты бон

15-æм апрелæй фæстæмæ гæххæттытæ исын райдайдзысты Александр Суворовы номыл Цæгат Кавказы æфсæддон училищæмæ. Ныр та уал абитуриенттæн сарæзтой гом дуæртты бон. Ахуыры фæткимæ базонгæ сты æрбацæуджытæ иууылдæр. Æнцон сын кæй нæ уыдзæн фыццæгты, уый сæ нæ басусæг кодтой. Æфсады уагæвæрдæй ницæмæй хицæн кæны. Фæлæ ацы зындгонд ахуыргæнæндонмæ бахауын уæддæр бирæты фæнды. Ссæуынц æм суанг Уæрæсейы дард регионтæй дæр. Александр Суворовы номыл училищæйы ныртæккæ ис бирæ адæм. Æрыгон лæппутæ бæстыхайы кълæстæм цымыдисæй кæсынц. Сæхицæн рагæй снысан кодтой, ам сæ ахуыр кæнын кæй фæнды, уыцы хъуыды. Шахрурамазан Гаджимагомедов: «Мæн фæнды Суворовы номыл училищæмæ бацæуын. Ам тынг цымыдисаг у ахуыр кæнын. Ис дзы спортæй дæр архайæн, алыхуызон хъæзтытæй хъазæн, стæй бирæ хæлæрттæ скæнын». Александр Суворовы номыл Цæгат Кавказы æфсæддон училищæйы радон хатт сарæзтой гом дуæртты бон. Азæй-азмæ ардæм ахуыр кæнынмæ æрбацæуын кæй фæнды, уыдон кæнынц фылдæр. Ацы хатт ахуыргæнæндон бабæрæг кодтой 500 адæймагмæ `ввахс. Æрыгон лæппутæн сарæзтой экскурси бæстыхайы. Равдыстой сын кълæстæ, хæрæндон, спортивон зал æмæ историйы музей. Училищæмæ ахуыр кæнынмæ æрбацæуынц æрмæст Цæгат Кавказы алы къуымтæй нæ, фæлæ ма Уæрæсейы иннæ регионтæй дæр. Училищæйы уæвыны фæтк æнцон нæу. Уый тыххæй ныййарджытæ æмæ сывæллæттæн æппæты фыццаг фехъусын кæнынц. Фæсивæд раст цыма æфсадмæ бахауынц, афтæ рауайы. Хестанты Алан: «Райсомы 7 сахатыл райхъал вæййæм, нæ дарæс нæ уæлæ акæнæм. Ныртæккæ уал дарæм зымæгон спортивон дарæс. Сæрды та ныл вæййы æндæр дзаумæттæ. Уый фæстæ нæхи ахсæм æмæ нæ хуыссæнтæ бафснайæм. Фыццаг нæм зын фæкæсы сынтæг раст бафснайын. Фæлæ фæцалх вæййæм. Уый фæстæ сбæрæг вæййы, æфснайыны рад кæмæ хауы, уыдон. Фæхъæуы сæ уæттæ бафснайын, мах та ацæуæм аходæн кæнынмæ. Стæй нæ алчидæр йæ хæстæ базоны, 9 сахатыл та райдайынц нæ урочытæ». Специалистты хъуыдымæ гæсгæ, ахæм фæтк хæрзмæ ахады ахуырдзаутыл. Науæд хи раст чи дары æмæ раст зондахастимæ сывæллæтты не схъомыл кæндзынæ. Фæсивæд ахæм уагæвæрдыл тагъд ацахуыр вæййынц. Училищæйы разамындæн ахсджиаг канд æфсæддон цæттæдзинад нæу. Ахсджиагыл нымайынц сывæллоны алывæрсыгæй бацæттæ кæнын дæр. Хуымæтæг урочытæй уæлдай ма ахуырдзаутæ æнтыстджынæй архайынц спорты цалдæр хуызæй дæр, ахуыр кæнынц дыууæ фæсарæйнаг æвзаджы, архайынц наукон сфæлдыстадæй, хъазынц шахматтæй. Суанг ма кафынмæ дæр арæхсынц. Ныййарджытæн æппæты вазыгджындæр вæййы, сæ хъæбул цы кусы æмæ йын цавæр æнтыстдзинæдтæ `фты йæ къухы, уый зонын. Александр Суворовы номыл Цæгат Кавказы æфсæддон училищæйы хицау Тауытты Руслан: «Ныййарджытæн цымыдисаг вæййы сæ цоты царды фадæттæ базонын. Цавæр ахуырадон-материалон æрмæджытæ æмæ кусæнгæрзтæй пайда кæнæм, цы сын хæрын кæнæм, стæй ма ахуырадон программæйæ уæлдай сывæллон цы мигæнæг вæййы, уыдæттæ. Мах сын радзурæм, ахуырæй уæлдай ма сæ сывæллæтты алывæрсыг рæзтыл дæр кæй кусæм». Гæххæттытæ ахуыргæнæдонмæ исын райдайдзысты 15-æм апрелы. Æвзарæн къæпхæн уыдзæн июны райдиан. Йæ хатдзæгтæ йын арвитдзысты Уæрæсейы хъахъхъæнынады министрадмæ. Афтæмæй сбæрæг уыдзæн, кадетты ном хæссын та чи райдадзæн, уыдоны номхыгъд дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv